Zëvendësministrja e Punëve të Brendshme, Anisa Ruseti, u bëri thirrje prindërve dhe kujdestarëve të mos lejojnë përfshirjen e fëmijëve dhe adoleshentëve në protesta të dhunshme, duke paralajmëruar për rreziqet e lëndimeve dhe pasojave psikologjike. Duke u referuar protestave të të rinjve që agravuan në dhunë, ajo njoftoi se mbi 270 persona i janë drejtuar spitaleve për ndihmë mjekësore gjatë ditëve të fundit; rreth 70 prej tyre ishin pjesëmarrës në protesta ose kalimtarë, ndërsa mbi 170 ishin efektivë të Policisë së Shtetit.
Ruseti theksoi se mbrojtja e fëmijëve është përgjegjësi e përbashkët dhe se të miturit nuk duhet të përfshihen në përplasje apo të përdoren për qëllime politike. Ajo rikujtoi se e drejta për protestë paqësore është e garantuar nga Kushtetuta dhe përfshin të drejtën e të rinjve për t’u dëgjuar, por vetëm përmes komunikimeve të qeta që nuk rrezikojnë sigurinë dhe shëndetin e tyre. Interesi më i lartë i fëmijës, sipas saj, duhet të jetë konsideratë parësore në çdo vendim dhe veprim që i prek ata.
Zëvendësministrja nënvizoi se menaxhimi i protestave duhet të mbështetet në komunikim, ulje të tensioneve dhe përdorim të forcës vetëm kur është i domosdoshëm dhe në masën minimale të nevojshme, siç parashikojnë standardet evropiane, dhe se ky standard duhet të udhëheqë veprimtarinë e Policisë së Shtetit. Ajo u shpreh se veprimet e dhunshme të individëve nuk justifikojnë trajtimin e të gjithë pjesëmarrësve si persona të dhunshëm dhe nuk duhet të vendosen përgjegjësi kolektive.
Ministria ka kërkuar që çdo veprim policor të jetë i ligjshëm, proporcional dhe i nevojshëm, ndërsa çdo pretendim për përdorim të tejskajshëm të dhunës do të shqyrtohet në mënyrë të paanshme dhe sipas ligjit. Ruseti apeloi te prindërit të dinë ku ndodhen fëmijët e tyre, me kë janë dhe çfarë përmbajtjesh marrin në rrjete sociale, t’u flasin për rreziqet dhe t’i këshillojnë që të largohen menjëherë nga vendet me tension. Ajo paralajmëroi për pasojat psikologjike të përjetimit ose dëshmimit të dhunës, dhe bëri thirrje te organizatorët, përfaqësuesit politikë, mediat dhe çdo të rritur me ndikim që të kontribuojnë në mbrojtjen e fëmijëve dhe të shmangin nxitjen e përplasjeve dhe normalizimin e dhunës.
