Ministrja britanike e Punëve të Brendshme, Shabana Mahmood, ka bërë thirrje për deportimin e familjeve shqiptare që kanë mbaruar e drejta e qëndrimit në Britani. Një mundësi që ofrohet është kompensimi prej më shumë se 3 mijë stërlinash për ata që pranojnë të largohen vullnetarisht.
Kjo iniciativë është rezultat i marrëveshjes së riatdhesimit të nënshkruar në 2022 ndërmjet kryeministrit shqiptar Edi Rama dhe ish-kryeministrit britanik Rishi Sunak. Zv-Ministri për Sigurinë e Kufijëve, Alex Norris, theksoi se kjo shumë është një investim i mirë për taksapaguesit britanikë, megjithatë, ai nuk ofroi detaje të sakta mbi shumën që do t’u jepet individëve.
Objektivi i kësaj politike është ulja e shpenzimeve që lindin nga mbajtja e këtyre familjeve në Britani. Norris deklaroi: “Për momentin ne mund t’u paguajmë rreth 3 mijë stërlina, dhe nuk kërkoj ndjesë për këtë fakt.”
Në një tjetër zhvillim, dje u bë e ditur se fëmijët e azilantëve që kanë dështuar me kërkesat e tyre për azil do të deportohen edhe nëse kanë lindur në Britani. Norris shpjegoi se çdo rast do të shqyrtohet individualisht, përsa i përket ligjeve të emigracionit, por se deportimi do të ndodhte kur rrethanat e kërkonin.
Taksapaguesit britanikë vazhdojnë të mbajnë barrën financiare për strehimin e azilkërkuesve me fëmijë të cilëve u është refuzuar azili dhe nuk kanë pranuar të kthehen në Shqipëri. Lajmi për dëbimin e 700 familjeve shqiptare u bë i njohur për herë të parë nga Ministrja Mahmood në parlamentin britanik, ku ajo gjithashtu po shqyrton mundësinë e rritjes së shumës për ata që janë të gatshëm të largohen vullnetarisht.
Kjo masë është pjesë e reformave më të gjera në fushën e emigracionit që po implementohen në Britaninë e Madhe.
