Ministri shqiptar i Ekonomisë në Maqedoninë e Veriut nga radhët e partisë BESA, Besar Durmishi, reagoi pas publikimit të mesazhit të ministrit të Jashtëm të Shqipërisë, Ferit Hoxha, dhe komentit të bërë prej tij për shqiptarët e Maqedonisë së Veriut. Në një postim në Fabook, Durmishi e përshkroi fjalorin e përdorur nga Hoxha si “zhgënjyes dhe i papërshtatshëm” dhe bëri thirrje për një reagim dhe sqarim urgjent nga Tirana zyrtare. Ai tha se ministri Hoxha duhet t’u kërkojë falje shqiptarëve të Maqedonisë së Veriut për ofendimet e bëra, duke theksuar se një gjuhë e tillë shkel çdo kodeks etik e profesional dhe është skandaloze për një përfaqësues të shtetit.
Durmishi citon edhe se Hoxha i ka quajtur shqiptarët e Maqedonisë së Veriut “idiotë”, dhe shpreh pakënaqësi ndaj qëndrimit të zyrave diplomatike shqiptare në Shkup. Ai vëren se heshtja e ambasadorit shqiptar në Shkup, Denion Meidani, është po ashtu zhgënjyese, duke thënë se në vend se të reagojë ndaj këtij fjalori, ambasadori ka zgjedhur të bëjë zëdhënësin e disa partive politike në Maqedoninë e Veriut.
Në reagim Durmishi i kujton Hoxhës obligimin kushtetues për të kujdesur për bashkëkombësit që jetojnë jashtë kufijve të Shqipërisë. Ai nënvizon se shqiptarët e Maqedonisë së Veriut nuk janë “fqinj” nga projekti i Tiranës zyrtare Open Balkan, por pjesë e pandashme e trungut kombëtar, duke kundërshtuar çdo përpjekje për t’i trajtuar ndryshe.
Reagimi i Durmishit kërkon sqarim dhe falje publike nga ministri i Jashtëm dhe kritikonte, për më tepër, mungesën e një reagimi diplomatik të qartë nga ana e përfaqësuesve shqiptarë në Shkup.
