Ministri i Brendshëm, Besfort Lamallari, ishte i pranishëm në seancën e Kuvendit pas thirrjes për interpelancë, por u largua pasi, sipas tij, nuk i ishte dhënë mundësia për të folur dhe debati u shndërrua në një proces konfliktues. Ai akuzoi opozitën se po bëhet “teatër” dhe nuk po synon të zhvillojë vërtet interpelancën me ministrinë.
Lamallari deklaroi se kishte kërkuar disa herë fjalën pa u lejuar të fliste. Ai kritkoi edhe vendimin për të mbajtur një minutë heshtje për efektivin e vrarë dhe më pas për mënyrën se si u zhvillua seanca, duke e cilësuar si të papranueshme sjelljen e atyre që, sipas tij, përpiqen të shfrytëzojnë viktimat për të arritur qëllime të tjera. Një nga deputetët që iu drejtua ashpër ishte Erald Kapri nga Partia Mundësia, i cili i kërkoi ministrit dorëheqjen pas ngjarjes së ditës në zonën e Maliqit në Korçë, ku raportohet se një efektiv i njësisë “Shqiponjave” humbi jetën.
Në fjalimin e tij, Lamallari pohoi se po komunikonte me drejtorin e Policisë së Shtetit dhe u njoftua për gjendjen e efektivit të plagosur, që, sipas ministrit, ishte jashtë rrezikut. Ai deklaroi se situata do të menaxhohej maksimalisht dhe do të merren masat e duhura. Ministri akuzoi gjithashtu pjesëtarë të opozitës se shkojnë në protesta, realizojnë materiale vizuale si “reels” dhe nuk ofrojnë frymëzim të vërtetë; përmendi emrin e Shehajt duke thënë se ka dalë nga partia dhe nuk i beson njeri, si dhe i kërkoi të mos bëjë zhurmë në seancë.
Duke theksuar se kishte ardhur për interpelancë, Lamallari vlerësoi se ajo nuk po zhvillohej në mënyrë të denjë dhe njoftoi largimin, duke thënë se ishte më e rëndësishme të ishte në Korçë për të ndjekur situatën se sa të qëndronte në Kuvend gjatë atij debati. Lajmi u përcjell nga Top Channel.
