Protestat që po zhvillohen në Tiranë prej 12 ditësh kundër investimeve në zonat e mbrojtura nuk e pengojnë procesin e integrimit të Shqipërisë në Bashkimin Evropian, u shpreh ministri i Jashtëm Ferit Hoxha gjatë një bashkëbisedimi me gazetarët e BE-së. Ai tha se protestat tregojnë lirinë e qytetarëve për të dalë në rrugë dhe kërkuar çfarë duan dhe se nuk sheh lidhje mes tyre dhe negociatave me BE-në. “Është e drejta e qytetarëve të protestojnë, ndërsa ne bëjmë punën tonë”, theksoi Hoxha, duke shtuar se në vendin tonë vetëm gjatë komunizmit nuk mund të protestohej.
Si kryeministri Edi Rama, edhe ministri Hoxha konfirmoi se investimi 4 miliardë eurosh në Zvërnec do të bëhet, por nënvizoi se aktualisht nuk ekziston ende një projekt të mbarë. Ai deklaroi se po punohet për një projekt dhe se beson në qeverinë e tij për zbatimin e tij: “Ne do ta bëjmë. Projekti do të bëhet nga arkitektët më të mirë brenda e jashtë vendit në këtë fushë.” Hoxha tha se do të kërkohet një ekuilibër midis zhvillimit dhe nevojës për mbrojtje, duke theksuar se bëhet fjalë për një projekt privat në një zonë private, nga një zhvillues privat. Roli i qeverisë, sipas tij, është të sigurojë që rregullat, zotimet ndërkombëtare dhe legjislacioni të zbatohen dhe i bëri thirrje publikut për durim për të parë se çfarë do të bëhet.
Konferenca me gazetarët e Bashkimit Evropian pati si fokus kryesor procesin e integrimit, ku ministri Hoxha deklaroi se vendi po ecën me ritme të pashembullta dhe synon mbylljen e të gjithë kapitujve vitin e ardhshëm. Lajmi është transmetuar nga Top Channel.
