Ministrat europianë Beate Meinl-Reisinger (Austria), Petr Macinka (Republika Çeke) dhe Juraj Blanár (Sllovaki) zhvilluan një konferencë me ministrin e Jashtëm të Shqipërisë, Ferit Hoxha, pas takimit të tyre zyrtar në Tiranë. Takimi vuri në fokus procesin e integrimit evropian të Shqipërisë, mbështetjen për reformat dhe çështje që lidhen me lidhshmërinë rajonale, energjetikën, transportin, migracionin dhe menaxhimin e kufijve.
Ministri sllovak Juraj Blanár deklaroi se Sllovakia është e gatshme të ofrojë ndihmë për mbylljen e grup-kapitujve dhe theksoi rëndësinë e zgjerimit: “Nevoja urgjente për zgjerim është më e domosdoshme. Është një element kyç për sigurinë e kontinentit. Është thelbësor për tradidat gjeo-politike. Rëndësia strategjike e rajonit është theksuar edhe më tej. Ne e shohim vizitën e ‘S3’ në Tiranë si në kohën e duhur. Shqipëria ka pasur përparim dhe ka përmbushur kritetet e integrimit, mund të shndërrohet në kampione në rajon, në këtë fushë. Është me rëndësi për të gjithë rajonin që të ketë sa më shumë shembuj pozitiv. Kërkojmë që parimi i meritës të jetë kyç.”
Ministrja austriake Beate Meinl-Reisinger shprehu mbështetje për integrimin gradual të Ballkanit Perëndimor dhe theksoi se Europa duhet të jetë “realiteti që e ndjejnë që sot, jo vetëm një premtim për të nesërmen”: “Ne mbështesim fort integrimin gradual të Ballkanit Perëndimor, hap pas hapi, përparim i prekshëm për njerëzit dhe bizneset. Vijoni me reformat.”
Mbështetjen e konfirmoi edhe ministri çek Petr Macinka, i cili përmendi aplikimin e Shqipërisë në 2009-ën dhe theksoi përparimin e shpejtë të vendit: “Çelja e grup-kapitujve në 30 muaj është e shkëlqyer, mbresëlënëse! Do të thotë se ju jeni angazhuar seriozisht, ky përparim është bazë e fortë për fazën e ardhshme.”
Ferit Hoxha deklaroi se anëtarësimi në BE mbetet prioritet strategjik i Shqipërisë dhe se procesi duhet të bazohet në meritë, reforma dhe rezultate konkrete. Ai bëri me dije se diskutimet përfshinë ndërlidhjet energjitike dhe korridoret e transportit, veçanërisht në dritën e zhvillimeve gjeopolitike, përfshirë situatën në Lindjen e Mesme, si dhe çështjet e migracionit dhe menaxhimit të kufijve, të cilat i konsideruan si dimensione kyçe të sigurisë së BE-së dhe të shteteve anëtare.
