Qyteti me më shumë traditë futbollistike në Itali, Milano, mund të mos jetë ndër vendet pritëse të Euro 2032, një kompeticion që Italia do të organizojë së bashku me Turqinë. Arsyeja kryesore është dosja për stadiumin e kryeqendrës lombarde, e cila ka ngjallur shqetësim brenda Federatës Italiane të Futbollit (FIGC) dhe, për momentin, nuk i siguron qytetit një vend mes pesë qyteteve italiane që do t’u propozohen UEFA-s.
Impianti i vjetër “Giuseppe Meazza” është jashtë gare, ndërsa i gjithë fokusimi përqendrohet te projekti i San Siros së ri. Vetë projekti nuk vihet në diskutim, por afati i ndërtimit po konsiderohet problematik. UEFA kërkon që punimet të përfundojnë në 2031, një objektiv që duket i rreptë dhe ku edhe ndryshimi më i vogël i programit mund të jetë vendimtar për fatin e kandidaturës së Milanos. Procesi i realizimit parashikon një rrugëtim të gjatë dhe me pengesa: prezantimi i projektit, përgatitja e Planit të Zbatimit, faza e paraqitjes së vërejtjeve dhe studimi i impaktit mjedisor përpara miratimit për Planin e Zbatimit dhe nisjes së punimeve, të parashikuara për në 2028. Për këtë arsye, autoritetet në Milano duhet të përshpejtojnë hapat, pasi më 1 tetor FIGC duhet t’ia komunikoje UEFA-s emrat e pesë qyteteve dhe stadiumeve kandidat, me mundësinë për të përfshirë edhe një rezervë.
Në garë për t’u përfshirë në listën zyrtare, Roma paraqet dy kandidatura të forta: Olimpico, që parashikohet të ristrukturohet, dhe stadiumi i ri në Pietralata, i cili ka procedura një vit përpara atyre të San Siros. Përveç kryeqytetit dhe Milano-s, lista e mundshme e qyteteve italiane vazhdon të jetë e gjatë. Juventus Stadium përmendet si i sigurt që do të jetë mes emrave që do t’u dërgohen UEFA-s. Napoli dhe Firenze duket se janë gati për ndërhyrje të rëndësishme ristrukturimi, ndërsa më pas renditen Palermo, Bologna, Bari, Genova, Lecce, Salerno, Torino e Verona — të gjithë me projekte që, sipas burimeve, nuk duhen nënvlerësuar.
