Pas një periudhe të vështirë me tre humbje në katër ndeshjet e fundit, që krijuan tension dhe dyshime mbi formën e skuadrës dhe të ardhmen e trajnerit Massimiliano Allegri, situata te Milani po jep sinjale përmirësimi. Gjatë krizat, disa yje si Rafael Leão dhe Christian Pulisic u vunë në qendër të kritikave, ndërsa u përfol edhe një largim i mundshëm i Allegrit drejt stolit të kombëtares italiane. Emri i Giovanni Malagò u përmend si mbështetës i kësaj hipoteze, por ai mohoi kontaktet konkrete.
Nga ambientet e klubit vijnë tashmë mesazhe më pozitive: drejtuesit duket se janë të prirur të vazhdojnë projektin me Allegrin dhe shfaqin një optimizëm të kujdesshëm për të ardhmen. Ekziston edhe një plan për të forcuar rolin e tij, duke e transformuar në një “menaxher” në stilin anglez, me ndikim të drejtpërdrejtë në vendimet e merkatos. Strategjia synon të ndërtojë një projekt të qëndrueshëm rreth tij dhe t’i japë më shumë kontroll dhe përgjegjësi, me qëllim edhe shmangien e tundimeve nga detyra e kombëtares.
Sezoni ka treguar se Milani ka një formacion titullar cilësor, por mungesa e alternativave të besueshme është shfaqur si dobësi e dukshme. Lojtarë si Ardon Jashari dhe Christopher Nkunku nuk kanë arritur të japin ndikimin e pritur, duke lënë boshllëqe në momente kyçe. Në përgjigje, drejtuesit kanë vendosur të ndërhyjnë fuqishëm në merkato: objektivi është zgjerimi i skuadrës me të paktën tre përforcime të rëndësishme, lojtarë me eksperiencë të lartë dhe profile të ngjashme me Adrien Rabiot.
Qëllimi i këtyre lëvizjeve është që Milani të rikthehet protagonist në Serie A dhe të luftojë për titullin kampion, duke përmirësuar njëherësh ambiciet edhe në arenën evropiane. Nëse merkatoja verore realizon objektivat e përcaktuara, klubi pret që skuadra të kthehet shpejt në garë për trofe dhe të tejkalojë periudhën e pasigurisë që rrezikoi të destabilizonte projektin.
