Humbja ndaj Cagliarit në javën e fundit të Serie A la Milanin jashtë zonës Champions dhe pritet të sjellë ndryshime të mëdha në klub. Trajneri Massimiliano Allegri dhe Drejtori Sportiv Igli Tare janë nën presion, ndërsa largimi i Giorgo Furlani konsiderohet i sigurt. Nëse Allegri shkarkohet, siç është e mundur, klubi do të duhet të gjejë një zëvendësues dhe lind pyetja se kush do ta zgjedhë atë.
Sipas tekstit, në letër përgjegjësia për emërimin e trajnerit të ri do t’i takojë Shefit Ekzekutiv të ardhshëm, por ende nuk dihet se cila do të jetë figura e përzgjedhur për këtë post. Adriano Galliani konsiderohet një mundësi, por rikthimi i tij nuk shihet i garantuar. Shefi Ekzekutiv i ri do të duhet gjithashtu të zgjedhë Drejtorin Sportiv, por edhe për këtë pozitë nuk ka kandidat të fortë të konfirmuar. U përmend emri i Tony D’Amico, i cili po largohet nga Atalanta, por ai shihet si zgjedhje e Furlanit dhe për pasojë mund të mos jetë alternativë e preferuar nga administrata e re.
Në këtë kontekst ngritet edhe pyetja se kush do të vendosë mbi asetet teknike dhe organizative të klubit. Në letër përmenden dy figura të fuqishme të lidhura me Gerry Cardinale: Zlatan Ibrahimovic dhe Massimo Calvelli. Ibrahimovic, aktualisht këshilltar personal i pronarëve të RedBird, do të duhej të kishte një rol më të qartë dhe më praktik sesa ai i tanishmi për t’u konsideruar si vendimmarrës i zëshëm. Ndërsa Calvelli, i paraqitur si një lloj supervizori, përmendet se mund të ketë detyra të tjera jashtë Milanit që kufizojnë angazhimin e tij ekskluziv në klub.
Të hënën drejtuesit më të lartë të klubit janë nisur drejt selisë së kuqezinjve, ku ka shumë mundësi të zhvillohet një takim me Gerry Cardinale dhe nga i cili pritet të dalin vendime drastike për të ardhmen e klubit.
