Gazetari Milaim Zeka ka reaguar për sherrin mes Edi Kuçit dhe Jozefin Markut, i cili u bë viral në rrjetet sociale. Në një lidhje direkte me emisionin “Shqipëria Live”, Zeka tha se përgjegjësia kryesore për ngjarjet e dhunës, përfshirë këtë rast, bie mbi institucionet e drejtësisë dhe policisë në Shqipëri dhe në Kosovë.
“Nuk dua të them si është komentuar në Kosovë, por dua të them se fajtor i kësaj ngjarje është drejtësia shqiptare, policia shqiptare, prokuroria shqiptare, gjykatat në Shqipëri dhe drejtësia e Kosovës,” tha Zeka, duke shtuar se i njeh personalisht dhe familjarisht të dy personazhet. Ai përmendi se kishte drekuar me të afërmit e Jozit në Shqipëri vetëm një ditë më parë.
Zeka vuri në dukje një incident të mëparshëm, kur Jozefin Marku goditi me shpullë një person të quajtur Gjest në emisionin Big Brother, dhe kritikoi mungesën e veprimeve të autoriteteve atëherë. “Sipas meje, drejtësia shqiptare do të duhej të reagonte ndaj Jozit atëherë kur i ra me shpullë në Big Brother Gjestit. Do të thotë që ai mori dhunë dhe nuk u mor asnjë masë ndaj Jozit. Ky ishte gabimi i drejtësisë. Të paktën do të duhej të merrej në pyetje,” deklaroi ai.
Duke folur për Edi Kuçin, Zeka e konsideroi veprimin e tij “gabim të pafalshëm” dhe theksoi se nuk duhet të ofendohen në mënyrë të tillë anëtarët e familjes së dikujt. “Nuk i shahet njeriut nëna, motra, farefisi. Nuk fyhet njeriu, sepse asnjëherë nuk e di se çfarë reagimi do vijë,” tha Zeka. Ai përmendi se njihet si person i durueshëm dhe modern, dhe shtoi me nota personale: “Në të shumtën e rasteve, unë që njihem si shumë tolerant e shumë modern, shpeshherë e them që po të mos isha baba i katër vajzave, mbase do të isha terroristi më i madh i Ballkanit.”
Lidhja televizive përfshinte gjithashtu një video të ngjarjes, ndërsa informacioni publikohet nga Top Channel.
