Microsoft ka nisur një program të ri largimi vullnetar që i ofrohet rreth 60,000 punonjësve në SHBA, Kanada, Indi dhe Mbretërinë e Bashkuar. Lajmi u konfirmua për AFP, vetëm gjashtë muaj pas një programi të ngjashëm të zhvilluar më parë. Oferta përfshin vetëm disa kategori punonjësish dhe synon përshtatjen e fuqisë punëtore me nevojat në ndryshim të kompanisë. Në një letër drejtuar stafit, drejtuesja e Burimeve Njerëzore, Amy Coleman, e përshkroi programin si një mënyrë për të përshtatur organizimin e punonjësve me objektivat e kompanisë, pa përmendur drejtpërdrejt ndikimin e inteligjencës artificiale në strategji.
Programi vlen për punonjës deri në nivelin e zëvendëspresidentit, por përjashton disa kategori, përfshirë një pjesë të stafit të qendrave të të dhënave, si dhe personelin e shitjeve dhe marketingut. Ata që pranojnë ofertën do të marrin kompensim me kushte të ngjashme me ato të një largimi të iniciuar nga kompania. Microsoft pret që pjesëmarrja të jetë dukshëm më e ulët se në programin e prillit, i cili u ofrua rreth 8,750 punonjësve në SHBA dhe u pranua nga afërsisht një e treta e të kualifikuarve.
Programi i mëparshëm ishte i kufizuar për punonjësit që plotësonin kriterin kombinim moshe dhe vite shërbimi prej së paku 70 vjet. Në korrik, Microsoft deklaroi se pozicionet e liruara përmes këtij skemi nuk do të zëvendësoheshin nga inteligjenca artificiale. Kostoja e programit të prillit u njoftua si 900 milionë dollarë.
Në të njëjtën kohë, Microsoft ka vijuar riorganizimin e fuqisë punëtore: në fillim të korrikut shkurtoi rreth 4,800 vende pune, ose 2.1% të stafit global, pas eliminimit të më shumë se 15,000 pozicionesh gjatë vitit 2025. Raporti vjetor tregon një ulje prej 5,000 punonjësish për vitin që përfundoi më 30 qershor, rënia e parë që nga 2016; në fund të qershorit kompania kishte rreth 223,000 punonjës.
Gjithashtu, Microsoft po rrit investimet në inteligjencën artificiale: gjatë tremujorit prill-qershor shpenzoi 41 miliardë dollarë, kryesisht për qendrat e të dhënave dhe çipat. Kompania pritet të publikojë rezultatet financiare për tremujorin korrik-shtator dhe kishte parashikuar se investimet për këtë periudhë do të kalonin 50 miliardë dollarë. Programi i ri vjen kur Microsoft përshtat strukturën organizative me prioritetet e reja të biznesit dhe rrit investimet në AI dhe infrastrukturë teknologjike.
