Meta dhe YouTube kanë humbur një gjyq në Los Anxhelos, pas akuzave nga një përdoruese 20-vjeçare, e cila pretendoi se këto platforma i kishin krijuar varësi, ankth dhe depresion. Vendimi i jurisë, që i konsideron platformat si të pakujdesshme për mosinformimin e mjaftueshëm të përdoruesve rreth rreziqeve të shërbimeve të tyre online, mund të hapë rrugë për qindra padi të tjera të ngjashme.
E paditura do të marrë një dëmshpërblim prej tre milionë dollarësh, nga të cilat 70% do të paguhen nga Meta. Google ka deklaruar se do ta apelojë këtë vendim, duke argumentuar se YouTube nuk është një rrjet social, ndërsa Meta po shqyrton opsionet e saj ligjore.
Përdoruesja akuzoi platformat për krijimin e shërbimeve që ndihmojnë në formësimin e varësisë, veçanërisht përmes funksionit të pafund “scroll”. Ajo theksoi se përdorimi i këtyre platformave që nga fëmijëria kishte ndikuar në gjendjen e saj emocionale, duke shkaktuar ankthin dhe depresionin që përjetonte.
Ky proces gjyqësor përfshiu YouTube dhe Instagramin, platformë e Meta-s, ndërsa konkurrentët si Snapchat dhe TikTok arritën të shmangin gjykimin përmes marrëveshjeve. Gjatë seancës dëshmoi edhe Mark Zuckerberg, drejtori ekzekutiv i Meta-s.
Ky rast nuk është i pari për kompaninë; një tjetër juri në Nju-Meksiko kishte dënuar Meta-n me 375 milionë dollarë për moszbatimin e masave mbrojtëse për përdoruesit e rinj. Meta ka njoftuar gjithashtu se planifikon të apelojë këtë vendim të mëparshëm, duke shtuar faktin se ngjarjet që lidhen me padi të ngjashme po bëhen gjithnjë e më të zakonshme në këtë sektor.
