Pas publikimit nga Top Channel të rastit të mësuesit të anglishtes në shkollën 9-vjeçare “Gustav Majer” në Tiranë, i cili predikonte te nxënësit fenë e Jehovait, ka reaguar Drejtoria Rajonale e Arsimit Parauniversitar Tiranë. Sipas një njoftimi, mësuesi Dritan Zaimi është shkarkuar nga detyra pas një procesi verifikimi të kryer nga drejtoria e shkollës në bashkëpunim me shërbimin psikosocial.
Drejtoria e shkollës ka bërë verifikime të detajuara duke administruar materialet e përdorura gjatë orëve të mësimit. Procesi ka ndjekur hapat ligjorë dhe institucionalë, duke përfshirë përcjelljen e rastit në Komisionin e Etikës dhe shqyrtimin e tij nga Komisioni i Disiplinës. Ky komision ka vendosur, me votim të fshehtë, që Zaimi të largohet nga puna me 7 vota pro.
Drejtoria e shkollës ka nisur procedurat për zgjidhjen e njëanshme të kontratës së punës, duke u përmbajtur legjislacionit të Republikës së Shqipërisë, përfshirë Kodin e Punës dhe rregulloren për funksionimin e institucioneve arsimore. Mësuesi është njoftuar të paraqitet më 09.02.2026 për të shprehur qëndrimin e tij në lidhje me vendimin.
Që prej datës 03.02.2026, Zaimi nuk ka zhvilluar më orë mësimore në shkollën “Gustav Majer”. Drejtoria thekson angazhimin e institucioneve arsimore për të respektuar standardet profesionale, etikën dhe sigurinë e nxënësve, duke vepruar në përputhje me ligjin dhe procedurat përkatëse.
