Një finale botërore dhe një tjetër ndeshje për “yllin e tij të dytë” e ndajnë sërish Lionel Messin nga lavdia, por ajo që 39-vjeçari arriti në Katar mund të përsëritet në New York. Deri tani Messi ka fituar katër finalet e fundit me Argjentinën (Botërorin 2022, Kupën e Amerikës 2024 dhe 2020 dhe Finalissima 2021), ndërsa përpara këtyre kishte humbur katër finale radhazi (Kupa e Amerikës 2007, 2015 e 2016 dhe Botërori 2014), çka e vendos suksesin e tij me kombëtaren në rreth 50%.
Në total, Messi ka luajtur 43 finale në karrierën e tij me klube dhe kombëtaren, duke fituar 30 prej tyre, një përqindje suksesi prej 69%. Efektiviteti i tij në finale është i lartë, megjithatë jo i paprecedent. Për t’u rikthyer te triumfet, Messi dhe kombëtarja argjentinase ndjekin rituale të njëjta që i kanë shoqëruar në ngjarjet e mëparshme të mbyllura me sukses. Te Messi kjo shfaqet si një obsesion: ai po poston në rrjetet sociale fjalë të njëjta me ato që publikoi para Botërorit 2022, duke i ripërdorur si mënyrë komunikimi dhe lidhjeje me momentin kur arriti të fitonte titullin e kampionit të botës.
Argjentina, me Messin në krye, po qëndron në të njëjtin hotel që i solli fat në edicionin e fundit të Kupës së Amerikës 2024, veçanërisht para gjysmëfinales kundër Kanadasë (2-0): Hilton Short Hills në New Jersey. Ritualet kalojnë edhe te organizimi i brendshëm; shpërndarja e dhomave është bërë si atëherë, lojtarët ndahen në të njëjtat dyshe dhe madje numrat e dhomave janë të njëjtë.
Në të gjitha finalet që ka luajtur, Messi ka shënuar 35 gola dhe ka dhënë 17 asistime, shifra që e bëjnë shpesh vendimtar në sfidat për trofe. Në nivel klubi, tek Barcelona ky ndikim është më i dukshëm, me 23 tituj të fituar në 31 finale. Me kombëtaren argjentinase përqindja e suksesit është më e ulët, rreth 50%. Finalja në New York pritet të prishë ekuilibrin dhe mund të jetë një ndër betejat e fundit për një titull që Messi zhvillon në karrierën e tij si pjesëtar i kombëtares.
