Çmimet e larta të naftës po nxisin veprime nga qeveria gjermane, ku po diskutohen dy zgjidhje të ndryshme për lehtësimin e barrës së karburanteve. Kancelari federal Friedrich Merz (CDU) vlerëson se për shumë qytetarë është arritur kufiri i përballueshmërisë dhe deklaroi se qeveria po shqyrton ndërhyrje përmes taksave dhe tarifave. Ai tha se po zhvillohen konsultime intensive me landet dhe premtoi që një propozim konkret do të parashtrohet shpejt. Industria e naftës pret që normalizimi i çmimeve të ndodhë vetëm gjatë vitit të ardhshëm. Në mbledhjen e kabinetit të planifikuar për të mërkurën nuk priten vendime zyrtare, por çështja do të diskutohet të paktën në mënyrë joformale.
SPD-ja propozon kufizimin e çmimeve dhe vendosjen e një takse mbi fitimet e tepërta të koncerneve të naftës. Socialdemokrati Armand Zorn përmend si model Belgjikën, ku shteti vendos çdo ditë një çmim maksimal të karburanteve, i cili bazohet në ecurinë e çmimit të naftës dhe kostot e tregut; pikat e karburantit mund të ofrojnë çmime më të ulëta, por jo më të larta se kufiri i përcaktuar. SPD-ja argumenton se kjo skemë mbron konsumatorët nga rritjet e pakontrolluara pa krijuar kosto shtesë për buxhetin e shtetit.
Ministria e Ekonomisë shpreh skepticizëm ndaj propozimeve të SPD-së, duke qenë kundër si kufizimit administrativ të çmimeve, ashtu edhe vendosjes së një takse mbi fitimet e tepërta. Sipas burimeve të ministrisë, këto masa mbartin probleme dhe rreziqe të konsiderueshme. Ajo argumenton se modeli luksemburgas nuk është i përshtatshëm për Gjermaninë për shkak të madhësisë së tregut dhe kushteve të ndryshme ekonomike dhe paralajmëron se një tavan çmimesh mund të shoqërohej me probleme ligjore dhe kosto të konsiderueshme për shtetin. Si shembuj përmenden Polonia dhe Austria, të cilat hoqën masa të ngjashme pas pak muajsh.
Ministrja e Ekonomisë Katharia Reiche mbështet një alternativë: pagesa të drejtpërdrejta për familjet me të ardhura të ulëta, të zbatuara nga Ministria Federale e Financave. Ajo vlerëson se një instrument i tillë ekziston tashmë dhe do të lehtësonte shpejt barrën në mënyrë të targetuar për grupet më të prekura.
