Kancelari gjerman Friedrich Merz ka vlerësuar se lufta në Lindjen e Mesme nuk duhet të çojë në shembjen e shtetit iranian, duke theksuar se kjo mund të ketë pasoja të rënda për Evropën, sidomos në fushat e sigurisë, energjisë dhe migrimit. Në një deklaratë të tij, Merz ka theksuar se një konflikt i zgjatur në rajon nuk është në interes të kontinentit evropian.
Ai shprehu shqetësimin se destabilizimi i plotë i Iranit mund të ndikojë drejtpërdrejt në sigurinë rajonale dhe të shkaktojë ristrukturime të mëdha në flukset e migrantëve drejt Evropës. Kancelari shtoi se Gjermania ndan shqetësimet e SHBA-së dhe Izraelit lidhur me programet bërthamore dhe raketore të Iranit, si dhe me kërcënimet që Teherani i bëri Izraelit dhe mbështetjen për grupet e armatosura në rajon.
Megjithatë, ai theksoi rëndësinë që populli iranian të ketë të drejtën për të vendosur për të ardhmen e tij. Merz paralajmëroi se një shembje e plotë e shtetit iranian mund të çojë në kaos, siç ndodhi në Siri, dhe shprehu dëshirën që Irani të funksionojë si një shtet autonom.
Kancelari kërkoi që Shtetet e Bashkuara dhe Izraeli të krijojnë sa më shpejt kushtet për stabilizimin e Iranit, për të shmangur një situatë të përjetuar më parë në Siri. Merz përfundoi me një paralajmërim të qartë se një nga shqetësimet kryesore për Evropën mbetet parandalimi i flukseve të reja të refugjatëve nga ky rajon.
