Kryeministri Edi Rama u bëri thirrje kancelarit gjerman Friedrich Merz dhe Bashkimit Evropian të tregojnë më shumë guxim në procesin e zgjerimit, duke iu referuar vendimit të ish-kancelarit Helmut Kohl pas rënies së Murit të Berlinit. Në një intervistë për WELT, Rama e përshkroi Ballkanin Perëndimor si “vrimën” në mes të Evropës dhe paralajmëroi për rreziqet që sjell lënia e vendeve të rajonit jashtë BE-së. Ai përdori metaforën e një “barku të hapur” që ekspozohet ndaj infeksioneve dhe plagëve, dhe përmendi Rusinë, islamin radikal dhe kriminalitetin si “viruse” që mund të godasin rajonin.
Rama bëri edhe një krahasim me familjen, duke theksuar se shtatë vendet e Ballkanit që synojnë anëtarësimin janë si shtatë fëmijë, njësoj si shtatë fëmijë që përmendi Presidentja e Komisionit Evropian, Ursula von der Leyen. Ai pyeti retorikisht nëse është më mirë t’i rrisësh fëmijët brenda familjes apo t’i lësh jashtë derisa të rriten, duke argumentuar se afrimi i shpejtë me BE-në do t’i bënte vendet më të sigurta dhe më të lidhura me Evropën. Rama përshkroi skenarë ku fëmijët jashtë familjes miqësohen me “gangsterë rusë”, bëhen të varur nga “lodrat kineze” ose zhyten në ekstremizëm e dhunë.
Duke diskutuar për datën e mundshme të anëtarësimit, ku përmendet viti 2030, Rama komentoi ofertën e Merz për përshpejtim të procesit përmes aksesit gradual në tregun e përbashkët. Ai i bëri thirrje Evropës dhe kancelarit gjerman të rigjejnë guximin e Kohlit, që pas rënies së Murit të Berlinit deklaroi se “të gjithë jemi në të njëjtën varkë” dhe nuk vendosi kushte të gjata negociatash. Për pyetjen nëse BE-ja duhet të mbyllë sytë ndaj problemeve për arsye gjeopolitike, Rama tha se BE-ja duhet të kërkojë më shumë detyra shtëpie nga vendet kandidate, por theksoi dëshirën e tyre për t’u bërë pjesë e unionit.
Për Ukrainën, Rama vlerësoi se premtimet aktuale janë “një gënjeshtër” dhe se në rrugën e zakonshme të anëtarësimit ajo nuk do të pranohet; zgjidhja realiste sipas tij është t’i jepet Ukraina vend në tryezë dhe anëtarësimi i plotë përmes një procesi të bazuar në performancë. Në lidhje me zgjerimin dhe vendimmarrjen brenda BE-së, Rama pranoi rrezikun e bllokimeve nga anëtarët e rinj, por u angazhua për heqjen e të drejtës së vetos, duke argumentuar se kjo është e nevojshme për të konkuruar me Kinën, SHBA-në dhe Indinë. (Top Channel)
