Kryetari i PD Sali Berisha nuk tërhiqet nga vendimi për të organizuar protestën ditën e samitit të Bashkimit Europian në Tiranë, edhe pse Policia e Shtetit deklaroi se bulevardi “Dëshmorët e Kombit” do të jetë i bllokuar si masë sigurie.
Berisha tha se mijëra qytetarë do të derdhen atë ditë në bulevard për “t’i shpëtuar fytyrën Shqipërisë”, që sipas tij është shteti më i korruptuar i Europës.
Berisha tha se qytetarët nuk janë të korruptuar, por viktima të korrupsionit të qeverisë.
“Me protestën tonë, ne i shpëtojmë nderin, fytyrën, dinjitetin Shqipërisë dhe shqiptarëve. A nuk është Europa dhe bota që thonë se Shqipëria është vendi më i korruptuar? Atëherë çfarë do bëjmë ne? Do jemi në shesh për t’u thënë se i korruptuar është Edi Rama me qeverinë e tij. Ne nuk jemi të korruptuar, ne jemi qytetarë viktima të këtij korrupsioni. Shqipëria, jo nga ne, por nga mediat europiane dhe botërore, është cilësuar Kolumbia e Europës. Dhe kjo, jo pa baza”, deklaroi Berisha gjatë takimit me demokratët e Njësisë 7 në Tiranë.
