Tuneli i Llogarasë, i cili u hap gjatë muajit korrik, do të jetë në funksion të qarkullimit të mjeteve deri në fund të tetorit.
Burime zyrtare nga Autoriteti Rrugor bënë me dije se nga 1 nëntori, mjetet do të lëvizin vetëm nga Qafa e Llogarasë.
Të dhënat tregojnë se në 3 muaj në këtë tunel kanë kaluar 715 mijë makina.
Sikundër ishte thënë edhe më herët, tuneli do të ishte i hapur vetëm gjatë sezonit veror, për t’i dhënë një shfryrje trafikut drejt plazheve të jugut.
Punimet në tunel nuk konsiderohen të përfunduara, ndërsa afati final sipas kontratës është muaji dhjetor.
Ndërsa nga viti tjetër, lëvizja do të jetë me pagesë, 5 euro për një kalim.
Kujtojmë se opozita dhe ish-zëvendëskryeministri Arben Ahmetaj e kanë akuzuar Edi Ramën se me këtë tunel është bërë një vjedhje prej 50 milionë euro.
