Finalja e kampionatit Botëror të Formula 1 për vitin 2026 mund të zhvillohet në pistën e Imolas në Itali, si zëvendësuese potenciale e Çmimit të Madh të Katarit të parashikuar për 29 nëntor. Cirkuiti i Emilia Romagna po konsiderohet nga Liberty Media dhe FIA si një alternativë evropiane për shkak të destabilitetit gjeopolitik në Gjirin Persik dhe vështirësive në negociatat mes SHBA dhe Iranit mbi kalimin e anijeve në Hormuz.
Vendimi përfundimtar pritet të merret brenda 15 shtatorit, në periudhën mes garës së Madridit dhe Çmimit të Madh të Azerbajxhanit, me qëllim garantimin e zhvillimit të 22 garave të parashikuara në kalendar dhe respektimin e marrëveshjeve me transmetuesit televizivë. Operacioni vihet në dukje se do të ishte i ngjashëm me atë të mëparshëm, kur Çmimi i Madh i Bahreinit u spostua në pistën e Sepangut në Malajzi.
Sipas planit të propozuar, Katari do të mbante emrin e garës, do të kryente fushatën promocionale dhe do të mbulonte kostot organizative të garantuara për ACI dhe Formula Imola. Të ardhurat nga shitjet e biletave dhe sponsorizimet do të përfitoheshin nga promotori nga Lindja e Mesme, duke lejuar autodromin emilian të presë eventin pa përballuar shpenzimet. Për më tepër, mbajtja e garës në Imola do të mundësonte kompensimin e garës së anuluar në vitin 2023, e cila u anulua për shkak të përmbytjeve që goditën zonën.
Një faktor i panjohur i rëndësishëm është gjendja meteorologjike në fund të nëntorit: prezenca e mjegullës së dendur mund të pengojë fluturimet e helikopterëve të ndihmës dhe të paralizojë aktivitetet në pistë. Për të kompensuar orët e pakta me dritë, FIA dhe Formula 1 po konsiderojnë ripërcaktimin e orareve të fundjavës, përfshirë afrim të orës së kualifikimeve dhe të startit të garës së së dielës.
