Rikthimi i Princ Harry dhe Meghan Markle në Britaninë e Madhe nuk ndryshon statusin e tyre si persona privatë dhe nuk nënkupton rikthim në detyrat mbretërore, sipas një direktive të mbretit Charles dërguar zyrtarëve të lartë, Forcave të Armatosura dhe përfaqësuesve të Kurorës. Letra, dërguar nga Lord Chamberlain me urdhër të mbretit, vjen pas vendimit të çiftit për t’u rikthyer dhe pas kërkesave për sqarime rreth mënyrës së trajtimit të tyre nga institucionet.
Pallati bën të ditur se Harry dhe Meghan u tërhoqën nga detyrat zyrtare në janar 2020 dhe që prej atëherë nuk konsiderohen anëtarë aktivë të familjes mbretërore. Ata vazhdojnë të jenë financiarisht të pavarur dhe kanë të drejtën për mbrojtje të jetës private. Titujt “His Royal Highness” dhe “Her Royal Highness” mbeten të pezulluar dhe nuk do të përdoren. Aktivitetet bamirëse të çiftit konsiderohen private dhe nuk zhvillohen në emër të Kurorës.
Direktiva thekson se Harry dhe Meghan nuk përfaqësojnë familjen mbretërore dhe nuk kryejnë detyra zyrtare; pozicioni i tyre krahasohet me atë të qytetarëve normalë që ushtrojnë aktivitete tregtare dhe bamirësie. Qëllimi i Pallatit është të vendosë një ndarje të qartë mes angazhimeve personale të çiftit dhe detyrave zyrtare që kryhen nga anëtarët aktivë të familjes mbretërore.
Sa i përket sigurisë dhe fondeve publike, çështjet operative të mbrojtjes duhet t’u drejtohen autoriteteve përkatëse të policisë, ndërsa çdo pyetje nga institucione shtetërore rreth përdorimit të fondeve publike duhet t’i drejtohet Pallatit të Buckingham. Korrespondenca dhe çështjet administrative që lidhen me Sussex duhet të dërgohen në zyrën e tyre, e cila funksionon në mënyrë të pavarur nga Oborri Mbretëror.
Pallati thotë se direktiva nuk sjell ndryshim të ri, por sqaron përfundimisht statusin e çiftit pas rikthimit në Britani rreth dy javë më parë me dy fëmijët; Princ Archie dhe Princesha Lilibet pritet të nisin shkollën atje këtë javë. Marrëveshja e Sandringham, e arritur pas largimit të tyre në 2020, mbetet në fuqi: ata mund të vazhdojnë aktivitete personale, tregtare dhe bamirësie, por nuk përfaqësojnë Kurorën dhe nuk kryejnë detyra zyrtare.
