Në Strasburg, në mbledhjen e Stabilizim-Asociimit Shqipëri-BE, përfaqësuesi i divizionit për zgjerimin e Ballkanit Perëndimor në Komisionin Europian, Clive Rumbold, vlerësoi se rrugëtimi europian i Shqipërisë ka avancuar dukshëm dhe komentoi protestën që ka hyrë në muajin e dytë, duke theksuar zhvillimin e saj në mënyrë paqësore. Ai bëri thirrje që të gjithë të përfshirët të qëndrojnë të qetë dhe të sigurojnë që protesta të mbahen në kushte të sigurta, duke e ushtruar të drejtën e tubimit dhe shprehjes sipas ligjit. Rumbold njoftoi se delegacioni i Komisionit po ndjek zhvillimet nga afër dhe ka qenë në terren që prej nisjes së protestës.
Ai pati edhe kërkesa konkrete ndaj qeverisë shqiptare, duke përmendur një hetim aktiv të SPAK për pronat në Zvërnec. Rumbold theksoi rëndësinë e luftës kundër korrupsionit si element qendror të procesit të zgjerimit të BE-së dhe nënvizoi nevojën që puna e ndërmarrë të vazhdojë në Shqipëri. Ai kërkoi kryerjen e një studimi të plotë mbi impaktin në ambient sipas standardeve më të larta dhe shprehu shpresën që Shqipëria të rishikojë ligjin e investimeve strategjike brenda vitit. Dialogu mes të gjithë aktorëve u paraqit si rruga e nevojshme për të ecur përpara.
Nga ana e politikës shqiptare, Taulant Balla deklaroi se Shqipëria ndodhet në një moment vendimtar drejt anëtarësimit në BE dhe se pritet drita jeshile pas mbylljes së tre kapitujve në mbledhjen ndërqeveritare Shqipëri-BE. Ai paralajmëroi sfidën e dezinformimit, duke e konsideruar luftën kundër tij si mbrojtje të së vërtetës dhe të demokracisë.
Demokrati Gazment Bardhi shprehu shqetësim për funksionimin e Parlamentit, duke thënë se kërkesat e deputetëve të PD, përfshirë 11 interpelanca ndaj kryeministrit, nuk janë marrë në shqyrtim dhe se Parlamenti nuk po ushtron kontrollin ndaj qeverisë.
