Mbledhja e Këshillit Bashkiak Shkodër ditën e sotme nisi me një minutë heshtje në nderim të viktimave të tragjedisë në Postribë të Shkodrës, ku humbën jetën një nëne dhe dy fëmijë të mitur. Viktimat janë identifikuar si 24-vjeçarja Bleona Çobaj dhe dy fëmijët e saj, me mbiemër Çela, njëri rreth 1 vjeç e tjetri rreth 3 vjeç. Ngjarja ndodhi kur banesa e vjetër e familjes u përfshi nga flakët dhe asnjë prej tyre nuk u arrit të shpëtohej në kohë.
Policia sqaroi se zjarri kishte ndodhur rreth orës 13:10, ndërsa 24-vjeçarja ishte brenda banesës së bashku me dy fëmijët. Paraprakisht dyshohet se shkak mund të ketë qënë shpërthimi i një bombole gazi që ndodhej në objekt. Në vendin e ngjarjes autoritetet kanë gjetur gjithashtu një shishe me benzinë. Hetimet paraprake vazhdojnë nga institucionet përkatëse për të sqaruar rrethanat dhe shkakun e saktë të zjarrit.
Familja Çela, sipas raportimit të korrespondentit të Top Channel, Klodian Zhivani, jetonte në Gjermani dhe kishte ardhur me pushime në Shkodër. Ata kishin mbërritur gjatë ditës në fshatin Domen, në shtëpinë e vjetër të familjes, me qëllim që të bëjnë riparime dhe punime të tjera në banesë. Ngjarja u regjistrua në banesën e vjetër familjare, ku po kryheshin punime.
Në vendngjarje punojnë forcat e rendit dhe grupet hetimore për mbledhjen e provave dhe për dokumentimin e plotë të skenës së zjarrit. Autoritetet lokale dhe ekipet e emergjencës janë angazhuar për të finalizuar verifikimet lidhur me materialet e gjetura dhe për të konfirmuar shkakun teknik apo ndonjë faktor tjetër që mund të ketë kontribuar në shpërthim ose përhapje të zjarrit. Raporti përfundimtar pritet të dalë pas përfundimit të hetimeve zyrtare.
