Kryeministri Edi Rama foli në Edicionin e Tretë të Javës së Administratës Publike, me temë Shërbimin Publik për një Shqipëri Europiane. Ai vuri theksin te rëndësia e dallimit mes shqetësimeve reale të qytetarëve dhe pjesës së zëshme të protestave, duke e përshkruar shqetësimin autentik si “uji i pastër” të protestës, ndërsa pjesën tjetër si “koren e zezë” ku sipas tij janë mbledhur të gjithë dështakët dhe zemërakët e vendit.
Rama theksoi se transformimi i administratës shtetërore është një proces shumë kompleks dhe i gjatë, që kërkon kohë, sepse lidhet me krijimin e mekanizmave që prekin shumë njerëz. Ai rikujtoi miratimin e ligjit të parë themelor të administratës publike rreth një dekade më parë dhe ndryshimet që kanë ndodhur me shërbimin civil, duke renditur si arritje një cilësi të re në administratën shtetërore, që ka ndihmuar edhe në procesin e negociatave.
Megjithatë, Rama pranoi se ndaj qytetarëve mbeten sfida të mëdha dhe se ata kanë të drejtën të trajtohen më mirë. Ai bëri dallimin mes administratës dhe gjyqësisë, duke sqaruar se administrata nuk mund të zgjidhë të gjitha hallet, sepse disa probleme kërkojnë zgjidhje gjyqësore. Po ashtu, nënvizoi se nëse ekzekutivi do të bëhej gjykatë, do të krijoheshin pasoja të tjera.
Pjesë të fjalës ia kushtoi një episodi personal që përshkruan zemërimin e qytetarëve ndaj mungesës së njerëzillëkut në shërbim. Rama rrëfeu se nëna e një shoku të tij, një grua e moshuar, kishte dalë në protestë pasi ishte ndjerë e poshtëruar nga përvoja e saj në poliklinikë: pritja që nis herët në mëngjes për të qenë e para në radhë, mungesa e përpikmërisë së mjekut dhe largimi i tij pasi trajton vetëm disa pacientë. Ai theksoi se, edhe kur sëmundjet nuk janë të shërueshme, mjeku dhe shërbimi publik janë të detyruar të ofrojnë njerëzillëk dhe komoditet, dhe se mungesa e këtij elementit është diçka që njerëzit nuk janë të gatshëm ta tolerojnë.
