Aeroplanmbajtësja amerikane USS Abraham Lincoln pritet të zëvendësohet në Lindjen e Mesme pas më shumë se 250 ditësh në det, ndërsa familjarë të marinsave kanë ngritur shqetësime për lodhjen ekstreme dhe shëndetin mendor të ekuipazhit. Një marins ka dërguar në WhatsApp mesazhin: “Jam i rraskapitur. I vdekur fare”, siç rrëfeu një familjar që foli për BBC në kushte anonimiteti. Ky familjar tha se marinsi kishte humbur rreth 29 kilogramë që nga fillimi i misionit dhe se lodhja psikologjike ishte përhapur te të tjerë në anije.
Sipas dëshmive të familjarëve, disa marinsa kanë tentuar të hidhen nga anija. Ata shprehin gjithashtu shqetësim për kushtet e jetesës; vizitat në porte janë ndaluar apo kanë qenë të rralla, duke kufizuar aksesin në ushqime të freskëta, dhe edhe kur anija ndodhet në port, marinsat nuk lejohen gjithmonë të zbresin. Përveç këtij familjari, edhe të tjerë kanë ngritur shqetësime për shëndetin mendor të personelit.
USS Abraham Lincoln u largua nga Kalifornia në nëntor, fillimisht drejt Detit të Kinës Jugore, dhe më pas u dislokua në Lindjen e Mesme. Sekretari amerikan i Mbrojtjes, Pete Hegseth, ka cilësuar raportimet mbi kushtet në bordin e aeroplanmbajtëses si “të paraqitura krejtësisht në mënyrë të shtrembëruar”.
Sipas raportimit të Wall Street Journal, Marina amerikane ka vendosur të dërgojë në Lindjen e Mesme aeroplanmbajtësen USS George Washington, e cila ka bazën në një port pranë Tokios dhe aktualisht është e dislokuar në Paqësor. Anija pritet të zëvendësojë USS Abraham Lincoln, që prej muajsh operon në ujërat pranë Iranit dhe ka marrë pjesë në operacionin “Epic Fury” kundër Republikës Islamike.
Vendimi për të dërguar një aeroplanmbajtëse tjetër vjen pas një dislokimi të zgjatur të ekuipazhit dhe në një periudhë të tensioneve të larta ushtarake në rajon.
