Kylian Mbappé nuk e fsheh më ambicien për të fituar për herë të parë në karrierë Topin e Artë. Sulmuesi i Real Madridit, 27 vjeç, thotë se e sheh veten si një prej kandidatëve dhe beson se ky mund të jetë viti i duhur, megjithëse vendimi përfundimtar u takon gazetarëve votues.
Sezonin e fundit me fanellën e Real Madridit, Mbappé shënoi 42 gola në 44 ndeshje, por skuadra spanjolle nuk arriti të fitojë asnjë trofe. Në Kupën e Botës ai fitoi Këpucën e Artë me 10 gola, duke e çuar në 22 numrin e golave të shënuar në historinë e tij në këtë turne. Megjithatë, Franca u eliminua në gjysmëfinale dhe e përfundoi kompeticionin në vendin e katërt.
Duke folur për mundësinë e fitimit të Topit të Artë, Mbappé pranoi hapur se e konsideron veten një prej kandidatëve. Ai theksoi lidhjen që krijohet mes lojtarëve të Real Madridit dhe këtij çmimi, duke thënë se kur luan për klubin “më të mirë në botë” njerëzit të lidhin automatikisht me Topin e Artë. “Ka shumë njerëz që flasin për mua dhe Topin e Artë. Sigurisht, kam bërë histori në kompeticionin më të rëndësishëm. Ndoshta ky është një vit i mirë për këtë, por njerëzit votojnë sipas asaj që mendojnë,” u shpreh ai.
Pyetur për vendin e tij në renditjen e futbollistëve më të mirë në botë, Mbappé deklaroi: “Unë gjithmonë mendoj se jam më i miri, por secili ka mendimin e tij. Ndoshta njerëzit mendojnë ndryshe. Nuk mendoj se është një diskutim që duhet ta bëjmë.” Ai e përsëriti synimin e tij për Topin e Artë: “Sigurisht që ky vit mund të jetë i mirë për mua për të fituar Topin e Artë. Por votojnë gazetarët.”
Lajmi për deklaratat e Mbappé është përpunuar nga Top Channel.
