Ditën e sotme që nga ora 07:00 e deri në orën 19:00 do të mbahen zgjedhjet e dyta vendore në Bashkinë e Kukësit brenda këtij viti pas dorëheqjes së ish-kryetarit Safet Gjici nga publikimi i një video-skandali seksual.
Kutive të votimit kanë të drejtë t’u drejtohen 46 mijë kuksianë për të shprehur vullnetin me anë të votës së tyre.
Në garë për Bashkinë e Kukësit janë dy kandidatë, Emri Vata i regjistruar nën siglën e koalicionit “Bashkë Fitojmë” dhe Albert Halilaj nga Partia Socialiste, ndërsa Partia Demokratike zyrtare, ndonëse u regjistrua si subjekt garues, nuk paraqiti kandidat.
Pjesëmarrësve në votim do t’u dorëzohet vetëm një fletë votimi, ajo për kryetarin e bashkisë, pasi për këshillin bashkiak gjithçka mbetet sipas rezultatit të 14 majit.
