Drejtoria e Hetimit të Krimit Kibernetik në Policinë e Shtetit, në bashkëpunim me autoritetet austriake dhe Europolin, ka finalizuar operacionin “Ghost Call” për të goditur veprat penale të mashtrimit kompjuterik. Hetimi, që zgjati rreth dy vjet, nisi pas një kërkese për informacion nga autoritetet austriake, duke çuar në identifikimin e veprimtarisë kriminale.
Gjykata e Tiranës miratoi kontrollin e ambienteve të dyshuara dhe të banesave të 9 individëve. Gjatë operacionit, u zbuluan operatorë që ushtronin aktivitet të paligjshëm, duke mundësuar dokumentimin e veprimeve kriminale. Prokuroria e Tiranës kërkoi dhe mori masa sigurie, duke përfshirë arrestimin e 7 shtetasve dhe shpalljen në kërkim të dy të tjerëve. Dy individë morën masa si “ndalim i daljes jashtë shtetit” dhe “detyrim për paraqitje në policinë gjyqësore”.
Gjatë operacionit, u arrestuan në flagrancë disa shtetas, të identifikuar si drejtues të ekipeve të aktivitetit kriminal. Ekzekutimi i vendimeve u realizua nga oficerët e Policisë së Shtetit, në bashkëpunim me Prokurorinë dhe ekspertë të Europolit. U sekuestruan gjithashtu 891,735 euro dhe një numër të madh pajisjesh elektronike, përfshirë 443 kompjuterë dhe 238 telefona celularë, të cilat dyshohet se janë përdorur për kryerjen e aktivitetit kriminal.
Hetimet vazhdojnë për dokumentimin e plotë të veprimtarisë dhe identifikimin e personave të tjerë të përfshirë. Ky është operacioni i parë që godet katër ambiente në të njëjtën kohë për veprimtari të jashteligjshme me qëllim mashtrimin online të shtetasve të huaj. Drejtimi i operacionit u realizua nga Drejtoresha e Krimit Kibernetik, Ervina Gjana, dhe Prokuroria Rovena Zoto.
