Pesë shtetas shqiptarë janë akuzuar në Britani për përfshirje në një skemë të dyshuar të martesa fiktive, me qëllim sigurimin e të drejtës së qëndrimit nën Skemën e Vendosjes së BE-së (EU Settlement Scheme). Sipas njoftimit të Prokurorisë së Kurorës (CPS), të përcjellë nga Top Channel, të pandehurit dyshohet se kanë përdorur dokumente të falsifikuara, duke përfshirë certifikata martese që paraqiteshin si të lëshuara në Qipro, për të vërtetuar lidhje martesore me shtetas të BE-së dhe për të përfituar status qëndrimi në MB.
Hetimet u zhvilluan pas një serie operacionesh të kryera nga Home Office në Angli dhe Uells më 17 qershor. Katër të pandehurit — Kastriot Hoxha, 31 vjeç; Sina Ervin, 35 vjeç; Kadri Sinamati, 28 vjeç; dhe Valdet Qoshi, 40 vjeç — akuzohen për mashtrim dhe shkelje të ligjit të emigracionit. Të katër janë lënë në paraburgim dhe pritet të paraqiten më 16 korrik në Gjykatën e Kurorës në Sheffield për seancën paraprake. Përveç akuzave për mashtrim, Kastriot Hoxha përballet edhe me një akuzë për posedim kanabisi me qëllim furnizimin.
Shqiptari i pestë, Denis Hani, 30 vjeç, pranoi fajësinë për mashtrim me deklarim të rremë dhe dy vepra të tjera penale. Ai u akuzua më 17 qershor dhe pranoi fajësinë një ditë më pas në Gjykatën e Magjistraturës në Birkenhead. Hani është lënë në paraburgim dhe do të dënohet më 16 korrik në Gjykatën e Kurorës në Liverpool.
CPS ka publikuar detaje të akuzave. Denis Hani pranoi fajësinë për mashtrim me deklarim të rremë, paraqitje të qëllimshme të deklaratave të rreme për përfitim personal ose të një tjetri, dhe sigurimin e lejes së hyrjes ose qëndrimit në MB përmes mjeteve mashtruese. Kastriot Hoxha përballet me dy akuza nën nenin 6 të Aktit të Mashtrimit (posedim/ kontroll dokumenti për përdorim në mashtrim), dy akuza sipas nenit 24A të Aktit të Emigracionit (paraqitje formularësh të rremë), dy akuza sipas nenit 2 të Aktit të Mashtrimit (paraqitje e rreme ndaj Home Office) dhe një akuzë për posedim lëndësh narkotike me qëllim furnizimin. Valdet Qoshi ka akuza të ngjashme me Hoxhën, ndërsa Sina Ervin dhe Kadri Sinamati përballen me një numër më të vogël akuzash sipas të njëjtave nene.
Prokurori i CPS për Yorkshire dhe Humberside, Shaun Sigamoney, theksoi se katër të pandehurit konsiderohen të pafajshëm deri në provimin e fajësisë dhe u bëri thirrje mediave e publikut të shmangin informacione që mund të ndikojnë në procesin gjyqësor.
