Manchester United rikthehet te fitorja në momentin vendimtar të sezonit, duke mposhtur 1-0 Chelsea-n në “Stamford Bridge” dhe duke konsoliduar pozitat në zonën e Ligës së Kampionëve. Ndeshja u zhvillua me ritëm të barabartë në pjesën e parë, ku Chelsea u duk më kërkues dhe krijoi rastet më të dukshme për shënim. Estêvão goditi shtyllën, ndërsa më pas Enzo Fernández ishte pranë golit, por pa mundur të dërgonte topin në rrjetë. Përkundër dominimit të londinezëve në disa faza, momenti vendimtar erdhi nga një aksion i United: Matheus Cunha shfrytëzoi një asist të Bruno Fernandes-it për të siguruar golin e vetëm të takimit dhe avantazhin për vizitorët.
Në pjesën e dytë, Chelsea rriti presionin për të kërkuar barazimin dhe krijoi disa raste serioze. Cole Palmer provoi nga distanca, Delap goditi traversën me kokë, ndërsa një tjetër përpjekje u ndal në shtyllë pas një devijimi në zonë. Moisés Caicedo gjithashtu ishte shumë pranë shënimit, por përpjekjet e tij nuk sollën gol. Pavarësisht presionit vendas, mbrojtja e Manchester United arriti të menaxhonte mirë avantazhin dhe të mbyllte hapësirat, duke mbajtur rezultatin 1-0 deri në përfundim.
Kjo disfatë për Chelsea shënon humbjen e katërt radhazi në shtëpi, një seri negative që nuk ishte regjistruar që prej vitit 1998. Humbja vjen në një periudhë kritike për londinezët, të cilët shohin të zbehen shpresat për një vend në katërshen e parë të renditjes dhe tashmë rrezikojnë të mbeten jashtë garës së elitës evropiane në sezonin e ardhshëm. Ndërkohë, fitorja i jep Manchester United-it një diferencë të rëndësishme ndaj rivalëve të drejtpërdrejtë në betejën për vendet e Ligës së Kampionëve dhe forcon pozitat e skuadrës në garën për kualifikim.
