Të tjera detaje janë zbuluar nga ngjarja e ndodhur një natë më parë në Tiranë ku pre e një atentati ranë djemtë e mitur të pronarit të kompanisë private “Pelikan Secyrity”, Vesel Bardhi Demiraj.
Ngjarja e rëndë u regjistrua rreth orës 21:50 të mbrëmjes të së enjtes ku persona ende të paidentifikuar qëlluan me breshëri plumbash drejt automjetit me të cilin po udhëtonin dy djemtë e Demirajt, Dior Demiraj, 11 vjeç, Marko Bardhi Demiraj, 17-vjeç dhe shoku i tyre 19-vjeçar, Kian Mullaj.
Automjeti tip “G-Class” me të cilin tre të rinjtë po udhëtonin po drejtohej nga 34-vjeçari Arenc Stafa, i cili rezulton se është punonjës i kompanisë “Pelikan Security” dhe në momentin ku dhe ndodhi ngjarja ishte shoqëruesi i tyre. Si pasojë e plumbave mbetën të plagosur katër personat që ndodheshin në këtë mjet, ndërkohë që 11-vjeçari ndodhet në gjendje të rëndë shëndetësore dhe po lufton për jetën në spitalin e Traumës.
Media më herët se Dior Demiraj ditën e djeshme festoi ditëlindjen e tij të 11-të. Ndërkohë, burime për mediat bëjnë me dije se në momentin kur dhe ndodhi atentati ata po ktheheshin nga festa e ditëlindjes.
I mituri, së bashku me vëllain e tij dhe shokun e tyre 17-vjeçar kishin shkuar me automjetin në pronësi të Vesel Demirajt në pistën e garave në Pjesë.
Pasi kishin festuar aty ata, të shoqëruar nga 34-vjeçari, ishin nisur për t’u kthyer për në Tiranë, në Lundër për të vazhduar festën e ditëlindjes së 11-vjeçarit me familjarët.
Sipas informacioneve të bëra me dije deri më tani, gjatë kthimit ata ishin futur në Unazë për të dalë në Lundër dhe kur janë futur te rrethrrotullimi i Shkozës, rreth orës 21:30 teksa po vijon rrugën për në autostradë, një automjet tjetër tip fuoristradë i zuri pritë dhe filloi të qëllojë në drejtim të tyre.
Breshëria e plumbave ka vijuar deri te Agropark, Tregu Agro Ushqimor, ku dhe ka qenë pika kulminate e të shtënave me armë. Drejtuesi i “G-Classit”, 34-vjeçari Stafa ka tentuar t’i shmanget plumbave me aq sa ka mundur dhe të shpëtojë tre të rinjtë, por si pasojë e plagëve të marra ai humbi ndjenjat në zonën e Lundrës.
Aty më pas kanë qenë njerëzit e rastësishëm të cilët kanë kaluar në rrugë dhe kanë njoftuar menjëherë Policinë, ndërkohë që thuhet se katër të plagosurit kanë qenë vetë qytetarët ata të cilët me mjetet e tyre private i kanë transportuar për në Spitalin e Traumës.
Si u fuqizua Vesel Demiraj dhe Pelikani Security!
Vesel Demiraj, pronari i Pelikani Security Group, firmosi një akt dhurimi të dyshimtë për policinë e shtetit. Demiraj i dha institucionin që ka për detyrë ta kontrollojë dhe t’i japë licencën për të vijuar aktivitetin, dhjetë gjysëmautomatikë PMX me vit prodhimi 2018-2019.
Por çfarë fshihet pas dhuratës mijëra euroshe për Drejtorinë e Përgjithshme të Policisë së Shtetit?
Në vitin 2014 kompanisë së policisë private, “Pelikani Security Group” ju vendos embargo në tendera për shkak të dokumenteve të rreme. Deri në tetor të vitit 2015, Demiraj nuk mund të përfitonte tendera publikë, megjithatë në rrethana të pashpjeguara nuk u bë një hetim i mirëfilltë për këtë kompani.
Në vitin 2020 drejtor teknik i kësaj kompanie u bë Flamur Muka, ish-shefi i komisariatit të Shijakut, i shkarkuar në tetor 2013 nga ish-ministri i Brendshëm, Saimir Tahiri. Muka më herët mbante po të njëjtën detyrë në kompaninë themeluar nga Luljeta Berisha, motra e Lulzim Berishës dhe Armand Zela, një biznesmen nga Kavaja.
Marrëdhëniet e Demirjat me institucionet shtetërore ndryshuan 180 gradë. Pelikani Security Group përfitoi një sërë tenderash kryesisht në sektorin e shëndetësisë. Tenderi për ruajtjen e Universitetit të Mjekësisë me vlerë rreth 18 milion lekë pati kontestime të forta në KPP për favorizim të paligjshëm.
“Përfaqësuesi i Pelikani Security përzgjodhi në të dyja rastet të njëjtën gogël dhe kjo gogël ishte me shenjë të dallueshme. Anëtarët e KVO goglën me shenjë ja morrën forcërisht nga duart përfaqësuesit tonë”, pretendonte kompania Myrto Security” shpk, e cila po ashtu merrte pjesë në garën për tenderin e Universitetit të Mjekësisë.
Por kontestimet dhe ankesat nuk ndryshuan rezultatin. Nami.al mëson se pas ceremonisë së dhurimit të armëve për policinë e shtetit, Vesel Demiraj është pritur në një takim nga ministri i Brendshëm, Bledi Çuçi. Nuk dihet ende se çfarë ‘pazari’ është diskutuar në takimin me dyer të mbyllura.
