Të paktën 10 persona kanë humbur jetën dhe 76 të tjerë janë plagosur si pasojë e sulmeve me dronë dhe raketa nga Rusia në Ukrainë gjatë 24 orëve të fundit, sipas autoriteteve ukrainase. Zyrtarët raportojnë viktima në pesë rajone: 3 të vdekur në Kherson, 2 në Odesa, 2 në Donetsk, 2 në Zaporizhzhia dhe 1 në Sumy.
Forcat ajrore ukrainase bëjnë të ditur se Rusia lëshoi 269 dronë gjatë natës, prej të cilëve 249 u rrëzuan ose u bllokuan, por sipas raportimit pati 19 goditje të drejtpërdrejta dhe një sulm me raketë balistike në 15 zona të ndryshme. Autoritetet ukrainase dokumentojnë dëme dhe viktima si pasojë e këtyre sulmeve.
Presidenti ukrainas Volodymyr Zelensky njoftoi se Ukraina kreu kundërsulm, duke goditur disa objektiva strategjikë rusë. Sipas tij janë sulmuar tre anije cisternë nafte, një anije luftarake me raketa dhe një anije patrullimi. Sulmet janë kryer në dy porte ruse, përfshirë terminalin e Primorskit në Detin Baltik dhe portin e Novorossiyskut në Detin e Zi. Zelensky deklaroi se cisternat e naftës ishin pjesë e “flotës hije” që Rusia përdor për të shmangur sanksionet ndërkombëtare.
Autoritetet ruse konfirmuan se Ukraina kishte lëshuar mbi 300 dronë dhe thanë se veçanërisht ishte shënjestruar rajoni i Leningradit, megjithëpse Moska minimizoi ndikimin e sulmeve. Kremlini njoftoi po ashtu se do të kufizojë ceremoninë vjetore të 9 Majit, duke e lidhur këtë vendim me atë që e cilëson si “kërcënim terrorist” nga Ukraina.
Ngjarjet e fundit shënojnë një përshkallëzim të konfliktit, me Ukrainën që po rrit goditjet në thellësi të territorit rus dhe me Rusinë që vazhdon bombardimet ndaj qyteteve ukrainase. Kievi thotë se synon objektiva ushtarake, ndërsa akuzon Moskën për sulme ndaj civilëve.
