RUSIA– Moska ka nisur një fushatë të fshehtë sabotimi brenda territorit të Ukrainës, ku po rekruton të rinj dhe adoleshentë ukrainas për të kryer akte të dhunshme, madje edhe sulme vetëvrasëse. Sipas mediave të huaja, që nga pranvera e vitit 2024, kjo fushatë ka kaluar nga zjarrvënia e automjeteve ushtarake dhe objekteve publike, në sulme me eksploziv.
Autoritetet ukrainase raportojnë se të rinjt po joshen përmes rrjeteve si Telegram, ku iu premtohet “fitim i lehtë” në këmbim të detyrave që në dukje duken të pafajshme, si vendosja e grafiteve apo dërgimi i pakove. Në realitet, shumë prej këtyre pakove janë bomba të gatshme për shpërthim me komandë në distancë, të cilat i kthejnë rekrutët në viktima të vetë atentateve.
Kjo strategji ruse synon të destabilizojë sigurinë e brendshme të Ukrainës përmes frikës dhe kaosit, si dhe të testojë forma të reja lufte hibride që mund të përdoren më vonë edhe kundër vendeve perëndimore. Nga ana tjetër, Ukraina ka nisur një fushatë sensibilizuese në shkolla, media dhe rrjete sociale për të paralajmëruar të rinjtë ndaj këtyre rreziqeve. Po ashtu, po monitorohen platformat ku ndodh rekrutimi, si Telegram, WhatsApp, Viber dhe Discord.
