Drejtuesi i Prokurorisë së Posaçme kundër Korrupsionit dhe Krimit të Organizuar, Klodjan Braho, mori pjesë më 22–23 maj në Palermo, Itali, në takimin ndërkombëtar “Bashkëpunimi ligjor ndërkombëtar dhe proceset e integrimit të organizatave kriminale transnacionale: analiza dhe perspektiva pune”. Aktiviteti u zhvillua në Pallatin e Drejtësisë në përkujtim të Giovanni Falcone dhe Paolo Borsellinos dhe mbledhë drejtues e përfaqësues të prokurorive dhe institucioneve të drejtësisë nga vendet e Europës, Ballkanit Perëndimor dhe Amerika Latine.
Në fjalën e tij, Braho nënvizoi qasjen e Prokurorisë së Posaçme ndaj sfidave që paraqet krimi i organizuar transnacional, i cili funksionon nëpërmjet rrjeteve ndërkufitare dhe përshtatet me zhvillimet teknologjike, financiare dhe logjistike. Ai theksoi nevojën për një qasje hetimore që synon të kuptojë të gjithë zinxhirin e veprimtarisë kriminale: nga burimi dhe organizimi i aktivitetit kriminal, te lidhjet ndërkombëtare, mekanizmat financiarë, pastrimi i produkteve të veprës penale dhe destinacionet përfundimtare të përfitimit të paligjshëm.
Takimi i kushtoi vëmendje edhe mënyrës së trajtimit publik të fenomenit të krimit të organizuar, duke theksuar nevojën për shmangien e përgjithësimeve mbi bazë kombësie, gjuhe apo përkatësie shoqërore. U saktësua se lufta kundër krimit të organizuar duhet të përqendrohet te individët, strukturat dhe rrjetet konkrete kriminale dhe të mbështetet mbi prova dhe analiza profesionale, si dhe mbi bashkëpunimin mes autoriteteve ligjzbatuese.
SPAK thekson se përballja me krimin e organizuar transnacional kërkon hetime proaktive dhe financiare, shkëmbim të shpejtë informacioni dhe bashkëpunim të qëndrueshëm me autoritetet homologe ndërkombëtare. Në këtë kontekst, Prokuroria e Posaçme paraqitet si partner serioz, i besueshëm dhe aktiv për bashkëpunimin ndërkombëtar në luftën kundër krimit të organizuar dhe korrupsionit.
