Lufta me Iranin po shndërrohet në një barrë gjithnjë e më të madhe për Shtetet e Bashkuara, duke ndikuar përtej kostove ushtarake direkte. Pas gjashtë muajsh konflikti, amerikanët po përballen me rritje të çmimeve të karburanteve, transportit dhe ushqimeve. Megjithatë, ekonomia e SHBA-së, sipas analizës, ende po reziston më mirë se sa ishte parashikuar: shumica e ekspertëve nuk presin një recesion dhe papunësia mbetet në nivele të ulëta.
Operacioni, që fillimisht konsiderohej i shkurtër, po zgjatet dhe po kthehet në një problem serioz për presidentin Donald Trump, me pasoja të drejtpërdrejta mbi bizneset dhe familjet amerikane. Arsyeja kryesore e ndikimit të gjerë ekonomik janë çmimet e larta të energjisë, të nxitura nga konflikti dhe nga paralizimi i lëvizjes në Ngushticën e Hormuzit. Bllokimi i këtij korridori ka prekur rëndë një nga rrugët më të rëndësishme të transportit detar të karburanteve, çka ka rritur koston e furnizimit global me naftë.
Ekspertja e mallrave në RBC Capital Markets, Alema Croft, thekson: “Tregu i naftës është veçanërisht shqetësues. Çmimet e naftës kanë arritur nivele rekord.” Nafta më e shtrenjtë rrit kostot e transportit dhe, si pasojë, çmimet e ushqimeve, mallrave dhe udhëtimeve, duke përfshirë zinxhirët e furnizimit dhe sektorët e lidhur ngushtë me energjinë.
Lufta ka rënduar edhe financat publike amerikane. Sipas vlerësimeve të paraqitura në analizë, kostoja direkte për taksapaguesit ka kaluar 100 miliardë dollarë dhe pritet të rritet më tej. Një pjesë e shpenzimeve ushtarake po financohet përmes huamarrjeve të reja, çka do të çojë në pagesa më të larta interesi në vitet e ardhshme dhe, përfundimisht, një barrë shtesë për taksapaguesit amerikanë.
