Një zjarr i përmasave të mëdha ka përfshirë pasditen Pyllin e Sodës në Vlorë, duke krijuar një re të dendur tymi që ka mbuluar pjesë të qytetit. Vatra ka rënë brenda pyllit me pisha, pranë vijës hekurudhore në zonën e Zvërnecit, dhe tymi është i dukshëm nga disa lagje të Vlorës.
Banorë dhe pushues janë vënë në ndihmë të zjarrfikësve për izolimin dhe shuarjen e flakëve. Zjarri është përhapur me shpejtësi, të favorizuar nga temperaturat e larta dhe era, çka ka detyruar forcat zjarrfikëse të vendosin në dispozicion gjithë personelin për ndërhyrje në terren. Flakët kanë marrë përmasa të konsiderueshme dhe rrezikojnë të përfshijnë një sipërfaqe të madhe me pyje dhe bimësi, me mundësinë që të afrohen edhe ndaj bizneseve dhe ambienteve të tjera pranë zonës së prekur.
Në terren ndodhen shërbimet zjarrfikëse, të mbështetura nga strukturat e tjera të emergjencës, që punojnë për të vënë nën kontroll situatën dhe për të parandaluar përhapjen e mëtejshme të zjarrit. Autoritetet u bëjnë thirrje qytetarëve të shmangin lëvizjet pranë zonës së prekur dhe të respektojnë udhëzimet e forcave në terren, ndërsa operacioni për shuarjen e flakëve vijon.
Siç raportoi korrespondenti i Top Channel, Mikel Marsi, menjëherë pas sinjalizimit drejt zonës janë nisur forcat e Policisë dhe shërbimet zjarrfikëse për izolimin dhe shuarjen e vatrës. Sipas të dhënave paraprake, situata paraqitet e vështirë për shkak të përhapjes së zjarrit në një zonë me bimësi të dendur dhe erës që favorizon avancimin e flakëve.
Burime nga shërbimi zjarrfikës bëjnë me dije se aktualisht në Vlorë janë aktive pesë vatra zjarri njëkohësisht, çka ka vështirësuar ndarjen e forcave në terren. Përveç zjarrit në Pyllin e Sodës, ndërhyrje po kryhen edhe në Dukat, pranë tunelit të Llogarasë, në zonën e Parkut të Mallrave dhe në Triport.
