Ka përfunduar protesta e 14-të para Kryeministrisë, pjesë e marshimeve që qytetarët zhvillojnë çdo ditë në orën 18:00. Protestuesit u mblodhën fillimisht në sheshin “Skënderbej” dhe marshuan drejt Kryeministrisë, ku shumë prej tyre morën mikrofonin për të mbajtur fjalime në një podium të improvizuar. Ditën e sotme u thirr për herë të dytë një protestë kombëtare, dhe gjatë zhvillimeve emigrantët shqiptarë morën gjithashtu fjalën.
Gjatë qëndrimit para Kryeministrisë disa protestues ngjiten mbi piramidën që ndodhet pranë godinës. Pas ndalesës, është parashikuar që protestuesit të vazhdojnë marshimin nëpër rrugët e kryeqytetit, siç kanë bërë edhe ditët e kaluara.
Në fjalimet e mbajtura para Kryeministrisë, dhjetëra qytetarë shkëmbyen përvoja dhe kërkesa. Një nënë foli për djalin që kishte humbur dhe kërkoi largimin e “gjithë atyre që ‘sundojnë’ politikën shqiptare”. Një zotëri i verbër theksoi problemet e mëdha dhe mungesën e mbështetjes nga ana e shtetit për personat me aftësi të kufizuara, duke vënë në dukje nevojën për trajtim dhe mbështetje më të mirë.
Mes të pranishmëve ishte edhe Florina Cani, nëna e 14-vjeçarit Martin Cani, i cili humbi jetën pas sulmit me thikë pranë shkollës “Fan Noli” në Tiranë; ajo mbajti një fjalim në podium, duke shprehur kërkesën për siguri. Protestuesit zhvilluan edhe një simbolikë tjetër: vendosën këpucë përpara Kryeministrisë si simbol të çdo personi që është larguar nga Shqipëria. Aktivistja Luçiana Kokaj, përveç fjalës për Rrjollin, foli për instalacionin me këpucët e të larguarve jashtë vendit.
Në sheshin “Skënderbej” u shfaq edhe një grup i drejtuar nga Pëllumb Pilinçi, i cili erdhi me pajisje zanore dhe shpërndau flamuj shqiptarë dhe amerikanë. Protesta po vazhdon prej dy javësh dhe mblidhet rregullisht çdo mbrëmje.
