Po mbahet sot në kryeqytet dita e 33-të e protestës, e paralajmëruar për në orën 19:00, pas asaj të mbajtur paraditen e kësaj të enjte para Kuvendit. Pas mbylljes së fjalimeve protestuesit nisën marshimin drejt Komisariatit nr.3, ku ndodhen qytetarët e arrestuar. Itinerari u përsërit: grumbullim në sheshin “Skënderbej”, marshim në bulevardin “Dëshmorët e Kombit” dhe stacionim para Kryeministrisë, ku mbajtën fjalimet.
Një nga folësit tha se, duke qenë se kishte seancë plenare, vendosën të ishin te Kuvendi për t’i thënë deputetëve se “nuk jeni përfaqësuesit tanë” dhe se kishin lajmëruar qytetarët të jenë të pajisur me vezë dhe miell për t’i goditur deputetët që nuk i përfaqësojnë. Protestuesit raportuan se janë dhunuar nga policia private e Manjës; një nga protestuesit dyshohet se i është thyer hunda. Sipas relacioneve të protestuesve, policia dukej e përgatitur për arrestime. Pas disa arrestimeve, protesta vijoi, por më vonë qytetarët që ishin ulur para Parlamentit filluan të dhunoheshin menjëherë nga policia. Policia e Shtetit ndërhyri me shkopinj gome dhe gaz lotsjellës.
Në fjalimet përpara Kryeministrisë u tha se qeverisë i është “sosur durimi” dhe u kërkua dorëheqja e kryeministrit; një folës deklaroi se protestën do ta vazhdojnë në mënyrë paqësore në bulevard deri sa të fitojnë. Një ish-oficer i lartë i policisë, duke folur me “kompetencën teknike” për menaxhimin e turmave, i bëri apel drejtorit të përgjithshëm të Policisë së Shtetit që të mbrojë popullin duke zbatuar ligjin, edhe pse, sipas tij, nuk e shpëton nga “vagonët e krimit të organizuar”.
Pas tensioneve dhe përplasjes ku qytetarët kanë gjuajtur me vezë deputetët dhe janë përplasur me policinë, protestuesit u ribashkuan në shesh dhe diskutuan për pjesëtarët e arrestuar. Nismëtari Alben Kola i bëri thirrje turmës të mos provokohet dhe të qëndrojë paqësore, duke deklaruar se policia duhet të zgjedhë mes shërbimit për mafian apo për popullin dhe se ata synojnë të rrëzojnë kryeministrin me një “revolucion paqësor”. Top Channel.
