Pak minuta para nisjes së sfidës Inter–Monza, presidenti i Interit, Giuseppe Marotta, u shpreh rreth të ardhmes së kapitenit Lautaro Martinez, emri i të cilit është lidhur me një transferim të mundshëm te Barcelona. Marotta për DAZN theksoi prerë se “Lautaro është kapiteni ynë dhe përfaqëson historinë aktuale të Interit. Ajo që mund të them është se nuk ekzistojnë kushtet që ai të largohet nga Interi. Nuk duhet të flitet as për këtë.” Me këto fjalë, drejtuesi zikaltër hodhi poshtë zërat për një largim të sulmuesit, pavarësisht raportimeve të fundit nga Spanja që e kanë lidhur atë me Barcelonën.
Presidenti foli gjithashtu për strategjinë e merkatos së ekipit dhe mundësinë e afrimit të një tjetër sulmuesi gjatë periudhës së transferimeve. Ai theksoi se klubi mbetet vigjilent për çdo mundësi që mund të shfaqet në treg dhe se veprimet bëhen në koordinim me trajnerin dhe me gatishmërinë e pronarëve. “Jemi të vëmendshëm për të kapur çdo mundësi, gjithmonë në koordinim me trajnerin dhe falë gatishmërisë së pronarëve, të cilët gjatë këtyre viteve kanë bërë investime të tjera. Nëse do të ketë mundësi për të investuar sërish, do ta bëjmë, edhe pse kjo skuadër është shumë konkurruese edhe kështu siç është,” tha ai.
Marotta sqaroi se Interi është ndërtuar me synimin e vazhdimësisë dhe për të shmangur ndryshime të mëdha nga sezoni në sezon. Sipas tij, klubi ka ruajtur strukturën e skuadrës disa vite dhe ka bërë ndryshime të kufizuara; këtë vit ishin të detyruar të largonin me keqardhje disa lojtarë për shkak të moshës. Ai shtoi se Interi ka sjellë futbollistë me përvojë dhe rreth 30 trofe të fituar, duke nxjerrë në pah rëndësinë e përvojës së lojtarëve përveç cilësive teknike.
Deklaratat e Marottës duket se qetësojnë situatën rreth Lautaros, duke bërë të qartë se për momentin Interi nuk e konsideron largimin e kapitenit një opsion, pavarësisht interesimit të raportuar nga Barcelona.
