Manel del Río do të largohet nga Barcelona në fund të këtij muaji, pas një vendimi të marrë me marrëveshje të dyanshme mes tij dhe klubit. Lajmi u bë i ditur fillimisht nga gazeta Ara dhe më pas u konfirmua nga Mundo Deportivo. Sipas raportimeve, Del Río i komunikoi vendimin presidentit Joan Laporta dhe këtë të hënë u përshëndet me anëtarët e Komitetit Drejtues të klubit. Burime pranë Barcelonës thanë se largimi është dakordësuar dhe klubi njohu punën e tij gjatë pesë viteve në institucion.
Del Río kishte shërbyer fillimisht si drejtor financiar dhe në shtator të vitit 2025 mori detyrën e drejtorit të përgjithshëm, pas më shumë se tre vjetesh pa një CEO në strukturën drejtuese qëndrore, pas largimit të Ferran Reverter. Pozicioni i drejtorit të përgjithshëm pritet të mbetet për momentin vakant, pasi klubi nuk ka planifikuar zëvendësimin e menjëhershëm të tij.
Në ndërkohë, Sergio Serrano pritet të marrë drejtimin financiar të klubit, duke zëvendësuar Marcel Ramírez. Serrano vjen nga Banco Sabadell, ku ka punuar gjatë periudhës së krizës financiare, dhe, sipas klubit, ka pasur një rol të rëndësishëm në menaxhimin e situatës atje. Ai do të jetë përgjegjës për drejtimin e fazës së re financiare të Barcelonës.
Largimi i Del Ríos vjen në një moment të rëndësishëm për financat e klubit: gjatë kohës së tij Barcelona arriti të rikthejë hapësirën e nevojshme nën rregullat e “fair-play” financiar të LaLigës, por klubi vazhdon të ketë nevojë për financime shtesë për përfundimin e projektit Espai Barça. Në Asamblenë e fundit, anëtarët delegatë miratuan kërkesën për një kredi tjetër prej 300 milionë eurosh, që do të përdoret për përfundimin e punimeve.
Largimi i tij vjen gjithashtu pas situatës me shitjen e biletave për ndeshjen Barcelona–Alavés, për të cilën drejtuesit e klubit dhanë shpjegime publike. Barcelona hyn kështu në një fazë të re në strukturën drejtuese, me postin e drejtorit të përgjithshëm të lënë vakant dhe me Serranon që pritet të marrë përgjegjësitë financiare.
