Bordi i Transparencës, në mbledhjen e datës 4 Qershor 2026, vendosi kufijtë e çmimeve për nënproduktet e naftës. Çmimi i shitjes me pakicë i gazoilit të standardit SSH EN 590 u caktua të jetë jo më shumë se 195 lekë/litër, ndërsa çmimi i shitjes me shumicë jo më shumë se 183 lekë/litër. Për benzinën është vendosur çmimi i shitjes me pakicë jo më shumë se 175 lekë/litër dhe çmimi i shitjes me shumicë jo më shumë se 163 lekë/litër. Çmimet e caktuara nga Bordi hyjnë në fuqi më 4 Qershor 2026 në orën 15:30 dhe do të jenë të vlefshme deri në mbledhjen e ardhshme të bordit, ku do të pasqyrohen ndryshimet e çmimeve të shitjes.
Bordi tërheq vëmendjen e çdo operatori të shitjes me shumicë dhe pakicë të nënprodukteve të naftës për detyrimin e zbatimit të këtij vendimi. Në rast të shkeljeve të konstatuara nga operatorë të ndryshëm, do të vendoset pezullimi i aktivitetit.
Ministria e Ekonomisë dhe Inovacionit, sëbashku me Ministrinë e Financave dhe Ministrinë e Infrastrukturës dhe Energjisë, janë angazhuar për mbrojtjen e interesave të konsumatorëve shqiptarë dhe për ruajtjen e parimeve të konkurrencës së ndershme në treg.
Sqarim lidhur me Aktin Normativ nr. 1, datë 3.4.2026: ky akt parashikon se në rast se çmimi i shitjes me pakicë për gazoil është më i lartë se 220 lekë/litër, apo për benzinën më i lartë se 200 lekë/litër, zbatohet niveli 80% i akcizës. Bazuar në metodologjinë për llogaritjen e çmimeve tavan të shitjes me pakicë, çmimet e përcaktuara nga Bordi janë nën kufirin e këtij akti normativ, dhe për rrjedhojë niveli i akcizës do të zbatohet i plotë, 100%.
Për gazoilin e përdorur për peshkim, referuar Ligjit nr. 9975, datë 28.07.2008 “Për taksat Kombëtare” (neni 9, pika 6) përjashtohen nga pagimi i taksës së qarkullimit dhe taksës së karbonit anijet e peshkimit. Gjithashtu, referuar nenit 10, pika 3, germa “d” të Ligjit 61/2012 “Për akcizat në RSH”, parashikohet përjashtimi nga detyrimet e akcizës i karburantit për anijet e peshkimit, sipas VKM. Në përputhje me metodologjinë e përcaktuar në aktin normativ, çmimi i shitjes së gazolit për peshkim rezulton 100 lekë.
