Bordi i Transparencës, në mbledhjen e datës 9 Maj 2026, vendosi kufizime të çmimeve për nënproduktet e naftës. Për nënproduktin gazoil me standardin SSH EN 590, çmimi maksimal i shitjes me pakicë u vendos të jetë jo më shumë se 197 lekë/litër, ndërsa çmimi maksimal i shitjes me shumicë jo më shumë se 185 lekë/litër. Për nënproduktin benzinë me standardin SSH EN, çmimi maksimal i shitjes me pakicë u vendos të jetë jo më shumë se 182 lekë/litër, ndërsa çmimi maksimal i shitjes me shumicë jo më shumë se 170 lekë/litër.
Çmimet e caktuara nga Bordi hyjnë në fuqi të njëjtën ditë, më 9 maj, në orën 14:00, dhe do të jenë të vlefshme deri në mbledhjen e ardhshme të Bordit, ku do të pasqyrohen ndryshimet e çmimeve të shitjes. Bordi tërhoqi vëmendjen e çdo operatori të shitjes me shumicë dhe pakicë të nënprodukteve të naftës për detyrimin e zbatimit të këtij vendimi. Në rast të shkeljeve të konstatuara nga operatorë të ndryshëm do të vendoset pezullimi i aktivitetit.
Ministria e Ekonomisë dhe Inovacionit së bashku me Ministrinë e Financave dhe Ministrinë e Infrastrukturës dhe Energjisë u angazhuan të mbrojnë interesat e konsumatorëve shqiptarë dhe ruajtjen e parimeve të konkurrencës së ndershme në treg.
Sqarim: Sipas Aktit Normativ nr. 1, datë 3.4.2026, “Për një shtesë në ligjin nr. 61/2012, ‘Për akcizat në Republikën e Shqipërisë,’” është përcaktuar se në rast se çmimi i shitjes me pakicë për gazoilin është më i lartë se 220 lekë/litër, apo për benzinën është më i lartë se 200 lekë/litër, zbatohet niveli 80% i akcizës. Bazuar në metodologjinë për llogaritjen e çmimeve tavan të shitjes me pakicë, çmimet e vendosura nga Bordi janë nën kufirin e parashikuar nga Akti Normativ nr. 1, datë 3.4.2026; si rrjedhojë, niveli i akcizës do të zbatohet i plotë, 100%.
