Ka nisur seanca plenare në Kuvendin e Shqipërisë. Në nisje, Niko Peleshi lexoi pikat e rendit të ditës dhe njoftoi se Konferenca e Kryetarëve kaloi projekt-kalendarin për punimet në Kuvend. Kryeparlamentari bëri të ditur se çdo ministër do të mbajë fjalën vetëm njëherë. Me 74 vota pro dhe 5 kundër u miratua bashkimi i interpelancave.
Deputeti i PD, Xhelal Mziu, e vlerësoi këtë vendim të pavend dhe kërkoi t’i jepet e drejta e interpelancës. Partia Demokratike kishte kërkuar interpelancë me ministrin e Bujqësisë, Andis Salla. Mziu tha se ai dhe një grup deputetësh kishin kërkuar interpelancë dhe në mënyrë të papritur ajo u anulua. Sipas tij, anulimi u arsyetua me hetimet e SPAK për fondet e IPARD, por kjo, për Mziun, përbën arsyetim të padrejtë, pasi Parlamenti dhe SPAK janë institucione të ndryshme. Ai theksoi se nuk synon të bëhet prokuror i ministrit, por avokat i situatës së bujqësisë.
Mziu deklaroi se ka një regres në bujqësi që nga viti 2020, me një rënie prej 1% dhe vazhdim të përkeqësimit deri në vitin 2026, duke e cilësuar vitin e fundit si më fatkeq për shkak të uljes së ndjeshme të fondeve për bujqësinë, ndërkohë që buxheti i përgjithshëm vazhdon të rritet. Ai vuri në dukje se Shqipëria për tre vjet nuk ka marrë fonde nga BE-ja, dhe se 33 milionë euro të lidhura me IPARD janë konsideruar nga OLAF si të vjedhura, duke kërkuar që paratë të kthehen dhe personat përgjegjës të sillen para përgjegjësisë. Gjithashtu përmendi dëmet nga përmbytjet, që sipas tij arrijnë mbi 300 milionë euro.
Sa i përket buxhetit të sektorit, Mziu tha se në Shqipëri ka 145 milionë euro për bujqësinë, prej të cilave vetëm 43 milionë shkojnë drejtpërdrejt te fermerët. Ai theksoi se mbështetja buxhetore është vetëm 1.8% e buxhetit të shtetit, dy herë më pak se Kosova dhe pesë herë më pak se Serbia. Po ashtu denoncoi çmimin e lartë të naftës në Shqipëri dhe akuzoi qeverinë se përfiton nga rritja e çmimeve në kohë lufte. Në përfundim, Mziu ripërsëriti kërkesën për interpelancë si një shqetësim real, jo si rol prokuror.
