Ditën e diel, Shqipëria do të ndikohet nga kushte atmosferike të paqëndrueshme. Moti pritet të jetë me vranësira mesatare deri të dendura, me reshje shiu të herëpashershme që do të fillojnë që në orët e para të ditës dhe do të vazhdojnë deri në mëngjes në pjesën më të madhe të vendit me intensitet të ulët. Në veriperëndim dhe jugperëndim, reshjet pritet të jenë me intensitet kryesisht mesatar dhe herë-herë do të shoqërohen me shkarkesa elektrike.
Gjatë ditës, reshjet e shiut do të mbeten të pranishme në mënyrë sporadike me intensitet të ulët, ndërsa në orët e mbrëmjes, ato do të ndërpriten. Në lartësitë mbi 600-700 metra në verilindje dhe mbi 1000 metra në juglindje, priten reshje bore me intensitet të ulët, me intensitet deri mesatar në Alpe dhe verilindje.
Era do të ketë drejtim nga juglinjda-veriperëndimi, me shpejtësi mesatare prej 7 m/s, ndërsa herë-herë, përreth vijës bregdetare dhe zonave luginore, shpejtësia mund të arrijë deri në 18 m/s.
Sa i përket detit, valëzimi në detet Adriatik dhe Jon parashikohet të jetë në forcën 3-4 ballë.
