Përveç “rregullit Vinicius” për kartonët e kuq, të miratuar nga FIFA për mbulimin e gojës, është vendosur edhe një masë tjetër e rëndësishme që synon të parandalojë përsëritjen e ngjarjeve të finales së fundit të Kupës së Kombeve të Afrikës midis Marokut dhe Senegalit, ngjarje e cila është ende në pritje të një vendimi nga Gjykata e Arbitrazhit për Sportin (CAS). Sipas vendimit të ri, çdo lojtar ose trajner që largohet nga fusha si shenjë proteste kundër vendimit të gjyqtarit do të përjashtohet menjëherë. Ky vendim është marrë nga FIFA dhe do të zbatohet menjëherë nga IFAB (Bordi Ndërkombëtar).
Qëllimi i masës është të parandalojë përsëritjen e episodit kur lojtarët senegalezë u larguan nga fusha pasi gjyqtari i dha Marokut një penallti në momentet përfundimtare të ndeshjes. Në atë ndeshje rezultati ishte 0-0 kur lojtarët senegalezë u larguan në shenjë proteste dhe u rikthyen në fushë rreth pesëmbëdhjetë minuta më vonë. Sipas analizës së situatës në dritën e rregullit të ri, nëse ky rregull do të ishte qenë në fuqi gjatë finales, të gjithë lojtarët senegalezë që dolën nga fusha dhe shkuan në dhomat e zhveshjes do të ishin përjashtuar dhe ndeshja do të ishte humbur.
Vendimi lidhet drejtpërdrejt me nevojën për të ruajtur vazhdimësinë e lojës dhe për të shmangur ndërprerjet e shkaktuara nga largimet masive të lojtarëve si formë proteste. Po ashtu, rregulli ka implikime në kampionatet kombëtare: në sezonin aktual të Superiores janë shënuar raste ku klube si Tirana dhe Egnatia kanë refuzuar të dalin në fushë në shenjë proteste kundër vendimeve të gjykimit. Prandaj pritet që ky rregull i FIFA-s të zbatohet edhe në vendin tonë, duke i dhënë fund kësaj mënyre proteste nga lojtarët dhe stafi teknik.
