Që nga 1 qershori, Klinika Stomatologjike Universitare ka nisur një depistim me njësi lëvizëse tek nxënësit e shkollave 9-vjeçare, duke filluar nga shkolla 9-vjeçare e Himarës, për shkak se shpesh hasin fëmijë me dhëmbë të prishur. Drejtoresha e Klinikës, dr. Belisa Kaleci, thotë se këto depistime realizohen vazhdimisht dhe se rezultatet tregojnë mungesë të higjienës orale kryesisht te fëmijët e zonave rurale për shkak të distancës fizike nga stomatologu ose arsyesh ekonomike. Problematika më e shpeshtë e hasur është kariesi dentar, pra dhëmbët e prishur.
Sipas dr. Kaleci, shëndeti i gojës lidhet ngushtë me shëndetin e përgjithshëm dhe krijon vështirësi praktike dhe sociale: “Shëndeti i gojës është shumë i rëndësishëm, lidhet me të gjithë shëndetin, por krijon probleme me përtypjen, me artikulimin dhe shkakton probleme sociale, kur frenon komunikimin me shokët.” Ajo thekson rëndësinë e larjes së duhur të dhëmbëve dhe jep udhëzimin se “një larje e mirë është kur kapet e gjithë sipërfaqja e dhëmbëve dhe kur lahen për 1.5 deri në 2 minuta.”
Me përfundimin e vitit shkollor, dr. Kaleci u bën thirrje prindërve të kujdesen që fëmijët të mos ndërpresin rutinën e higjienës orale. Ajo sugjeron që prindërit të përkujtojnë fëmijët për larjen e rregullt të dhëmbëve dhe të shfrytëzojnë pushimet për kontrolle rutine dhe, në rast nevoje, trajtime, “në mënyrë që të mos shkëputen nga shkolla.” Njësia lëvizëse e depistimit do të vijojë punën dhe do të udhëtojë në të gjithë vendin gjatë muajit qershor.
