Kryeministri i ri britanik, Andy Burnham, është akuzuar se “jeton në të kaluarën” pas fjalimit të tij të parë në Parlament, ku ai fajësoi ish-kryeministren Margaret Thatcher dhe Brexitin, si dhe rolin e ish-kryeministrit të djathtë David Cameron për mundësimin e referendumit. Burnham paraqiti një vizion të majtë, duke kërkuar një rol më të madh të shtetit në ekonominë britanike dhe duke pranuar se kostoja e jetesës është shumë e lartë pas dy vitesh nën qeverisjen e Laburistëve të udhëhequr nga Keir Starmer.
Ai premtoi se qeveria e tij do të shtonte kontrollet dhe do të shtetëzonte shërbimet kryesore publike, përfshirë ujësjellësat dhe shpërndarjen e energjisë elektrike. Një pjesë tjetër e programit të tij është një vale decentralizimi: dhënia e kompetencave më të mëdha autoriteteve lokale në mbarë vendin dhe shpërngulja e institucioneve qeveritare nga Londra drejt Manchesterit dhe rajoneve të mesme e veriore. Këto premtime burojnë edhe nga përvoja e tij si ish-kryebashkiak i Manchesterit, ku njihej ndër të tjerët si “Mbreti i Veriut”.
Burnham deklaroi se do të ç’rojë disa nga reformat e Thatcher-it, duke përmendur centralizimin politik, privatizimin dhe c’industrializimin që, sipas tij, dëmtoi pushtetin lokal. Sa i përket Brexit-it, ai sugjeroi se do të veprojë më shpejt dhe më tej sesa Starmer për të adresuar pasojat e referendumit, dhe nënvizoi se rritja ekonomike e Britanisë është dëmtuar në dekadën e fundit.
Në bashkëpunim me Liberaldemokratët, një nga objektivat e qeverisë së tij do të jetë ndryshimi i sistemit zgjedhor maxhoritar në Britani. Pas zëvendësimit të Starmer dhe një vere politike të qetë me Parlament të mbyllur, mandati i Burnham po hyn në një fazë provash; testi i parë i rëndësishëm i popullaritetit pritet të jenë zgjedhjet e reja të parakohshme në Londër, pas vendimit të Keir Starmer për të lënë Parlamentin si deputet, në mes të spekulimeve se ai mund të jetë kandidat për postin e kreut të NATO-s.
