Kryeinspektori Dashnor Sula ngriti nga Elbasani çështjen e ndotjes së mjedisit dhe njoftoi se do të zbatohet politika e tolerancës zero ndaj subjekteve që shkelin ligjin duke ndotur ambientin. Ai paralajmëroi se do të merren edhe masa ekstreme, përfshirë heqjen e licensave, ndaj atyre që dëmtojnë mjedisin dhe qytetarët.
Sula theksoi veçanërisht dëmtimin e lumenjve Shkumbin dhe Devoll, të cilët sipas tij janë “masakruar” gjatë viteve të fundit nga subjekte që kanë abuzuar me lejet mjedisore për shfrytëzimin e tyre. Ai kërkoi që institucionet përkatëse të kryejnë detyrën dhe të ndërmarrin masat e nevojshme për të ndaluar dëmtimin e këtyre burimeve ujore.
Kryeinspektori theksoi se prioritet i inspektoratit është jeta e qytetarit dhe se qëllimi nuk është të dëmtohen bizneset, por të mbrohet shëndeti publik. Ai njoftoi nisjen e një reforme tërësore të funksionimit të inspektorateve, me qëllim përmirësimin e kontrollit dhe zbatimin më efikas të ligjit. Si pjesë e kësaj reforme, do të merren masa edhe ndaj punonjësve të inspektorateve që shkelin ligjin ose nuk kryejnë detyrën e tyre.
Për të lehtësuar denoncimin e shkeljeve, Sula njoftoi se nga sot do të jetë funksional portali sigurt.gov.al, ku qytetarët dhe punonjësit mund të raportojnë raste të shkeljeve të subjekteve apo edhe të punonjësve të inspektorateve, duke ruajtur anonimatin e denoncuesve. Ky instrument, sipas tij, synon të rrisë transparencën dhe të forcojë kontrollin ndaj subjekteve që ndotin mjedisin.
Deklaratat e Sulas u bënë gjatë një aktiviteti në Elbasan, ku ai evidentoi nevojën për ndërhyrje të menjëhershme dhe përforcim të masave ligjore ndaj atyre që kontribuojnë në ndotjen e mjedisit.
