Kryetari i ri i bashkisë së Venecias, Simone Venturini, ka thënë se synon të rrisë tarifën e hyrjes për vizitorët ditorë në 50 euro në përpjekje për të “dekurajuar” ardhjet në periudhat e presionit turistik. Venturini, ish-nënkryetar i krahut të djathtë për turizmin, u zgjodh në fund të majit dhe gjatë fushatës kishte premtuar të rrisë tarifën nga 30 deri në 50 euro, në varësi të datave.
Venecia vendosi për herë të parë në 2024 një tarifë hyrjeje, 5 euro për 29 ditë piku midis prillit dhe korrikut. Masa u rifut në 2025 dhe u zgjerua në 54 data, me vizitorët e minutës së fundit që paguajnë dyfishin e çmimit; këtë vit nisma përfshin 60 data. Megjithë ndikimin të kufizuar mbi numrin e vizitorëve, sistemi solli 2.4 milionë euro të ardhura në vitin e parë, shumë më tepër se sa pritej, dhe autoritetet besojnë se masa do të ndihmojë në trajtimin afatgjatë të turizmit në qytetin e UNESCO-s.
Këshilli i qytetit po shqyrton një propozim për ta paraqitur qeverisë kombëtare, me kërkesë leje për të rritur tarifën e hyrjes “në ditë specifike dhe kur tejkalohen kufijtë e caktuar të rezervimit”. Tarifa paguhet në mënyrë elektronike; vizitorët marrin një kod QR që duhet t’ua tregojnë oficerëve që patrullojnë pikat kryesore të hyrjes së qytetit, si stacioni i trenit Venezia Santa Lucia.
Jashtë pagesës qëllimisht janë lënë vizitorët që kanë rezervuar qëndrime të natës në Venecia, turistët nga rajoni i Venetos — nga i cili vijnë shumica e vizitorëve ditorë — dhe fëmijët nën 14 vjeç. Megjithatë, edhe mysafirët që kanë rezervuar një dhomë hoteli duhet të deklarojnë praninë e tyre nëpërmjet faqes përkatëse të internetit.
Venturini deklaroi se tarifa e hyrjes është “aktualisht mjeti i vetëm efektiv për kontrollin e numrit ditor të vizitorëve” dhe se po punojnë për ta bërë atë më efektive në ditët e pikut, me synimin për të gjetur “një ekuilibër të ri midis nevojave të banorëve, punëtorëve dhe vizitorëve”. Ai shtoi se të ardhurat do të përdoren për të financuar shërbimet komunale dhe për të mbështetur mirëmbajtjen dhe mbrojtjen e qytetit, kostoja vjetore e të cilit i kalon 100 milionë euro.
