Kryeministri grek Kyriakos Mitsotakis shpalli, përmes një mesazhi televiziv, tetë masa të reja mbështetëse të qeverisë për familjet, pensionistët, qiramarrësit, fermerët dhe qytetarët me borxhe, me një kosto totale rreth 500 milionë euro. Mes masave kryesore është zgjatja e subvencionit për naftën edhe për muajin maj me 20 cent për litër, si dhe vazhdimi i subvencionit për plehrat kimike deri në gusht, nga i cili përfitojnë rreth 250 mijë fermerë.
Familjet me fëmijë do të marrin në fund të qershorit 150 euro për çdo fëmijë, pa pasur nevojë për aplikim; masa pritet të përfshijë rreth 975 mijë familje. Gjithashtu, rriten kufijtë e të ardhurave për kthimin e një qiraje në vit, duke përfshirë edhe rreth 70 mijë familje të tjera.
Pensionistët, të moshuarit pa sigurime dhe personat me aftësi të kufizuara do të marrin 300 euro në nëntor, nga 250 euro që ishte ndihma më parë; përfituesit arrijnë rreth 1.9 milionë persona. Një pjesë e rëndësishme e paketës synon lehtësimin e borxheve: qytetarët mund të fusin detyrimet e vjetra në skemë pagese deri në 72 këste, ndërsa borxhet midis 5 mijë dhe 10 mijë euro mund të përfshihen në mekanizmin jashtëgjyqësor.
Qeveria lidh shpalljen e këtyre masave me performancën fiskale të vendit: ekonomia greke ka shënuar një suficit primar prej 12.1 miliardë eurosh për vitin 2025, ose 4.9% të Prodhimit të Brendshëm Bruto, dhe sipas zyrtarëve ky rezultat i jep mundësi shtetit të ofrojë mbështetje shtesë në një periudhë të kostos së lartë të jetesës dhe presioneve nga kriza energjetike. Mitsotakis e përshkroi paketën si “ndarja e përfitimeve të ekonomisë me shoqërinë”, duke pranuar megjithatë se shumë qytetarë mund ta konsiderojnë atë të pamjaftueshme përballë kostos së lartë të jetesës.
